QR Prezidentiniń kómekshisi Erlan Qarin Memleket basshysy Qasym-Jomart Toqaevtyń Joldaý aiasynda júktegen mindetterdiń qalai iske asyp jatqany týraly aityp berdi, dep habarlaidy QazAqparat.
«Prezidenttiń biylǵy Joldaýy boiynsha iske asyp jatqan tapsyrmanyń biri tómengi jalaqynyń mólsheri 60 myń teńgege deiin kóterildi. Ol úshin tiisti zańǵa ózgeris engizilip, 2022-2024 jyldarǵa arnalǵan respýblikalyq biýdjet qaita qaraldy. Sonymen qatar Memleket basshysynyń tapsyrmasyna sáikes qylmystyq jaza zańyn jetildirý qolǵa alyndy. Osy oraida Bas Prokýratýra zańǵa tolyqtyrýlar men ózgerister engizip, ol Parlament qabyrǵasynda qaralyp jatyr», - dedi Erlan Qarin «Habar 24» telearnasyna bergen suhbatynda.
Onyń aitýynsha, biylǵy Joldaý boiynsha Memleket basshysy júktegen tapsyrmany oryndaý sol sátte bastalyp ketti. Ony iske asyrýǵa Parlament, Úkimet jáne basqa da quzyrly organdar atsalysyp jatyr.
«Memlekettik reformalardyń ishinde kópshilikke jaǵyp, kóńilinen shyqqan Prezident qabyldaǵan sharanyń biri - qazaqstandyqtardyń zeinetaqy qoryndaǵy jinaǵyn turǵyn úi alýǵa jumsai alýy. Sol sekildi densaýlyǵyn jaqsartýǵa da paidalaný múmkindigi bar. Qazannyń sońyndaǵy málimetter boiynsha, shataspasam, baspanaly bolǵysy kelgen qazaqstandyqtardyń 2 trln teńgeniń ótinishi maquldandy. Sondai-aq, otandastarymyz densaýlyǵyn kútý maqsatynda 49 mlrd teńge jumsaǵan. Bul degenimiz Prezident reformasy arqyly qarapaiym halyq máselesi ońtaily sheshimin taýyp jatyr degen sóz», - deidi ol.
