QR Memlekettik qyzmet isteri agenttiginiń tóraiymy Anar Jaiylǵanova Prezidenttik jastar kadr rezervine irikteýdegi test tapsyrmalary jóninde aityp berdi, dep habarlaidy QazAqparat tilshisi.
«Irikteýdegi verbaldy jáne sandyq testilerdi adamdardyń áleýetin obektivti baǵalaýdaǵy bedeldi halyqaralyq kompaniia ázirledi. Onda testiń birneshe nusqalary usynylǵan. Bul suraqtar arnaiy bilim men daiyndyqty talap etpeidi, qatysýshylardyń jedel jáne durys sheshim qabyldaý qabiletin anyqtaýǵa múmkindik beredi. Mundai test túrleri Ulybritaniia, AQSh, Eýropada memlekettik qyzmet júiesine jumysqa alý kezinde qoldanylady», - dedi
Onyń aitýynsha, mátindik materialdar men qujattar, diagrammalar men kesteler shekteýli ýaqytta basqarý sheshimderin qabyldaýdaǵy úmitkerlerdiń analitikalyq jáne syni oilaý deńgeiin anyqtaýǵa kómektesedi. Bul úzdik dep tanylǵan 300-den astam úmitkerdiń basty artyqshylyǵy bolmaq.
«Biz bul qatysýshylardy barynsha úzdik etip darialaimyz. Olar mindetti túrde memlekettik qyzmette jumys istesin degen talap joq. Túrli deńgeidegi jumystarǵa bara alady. Bul qatysýshylarǵa basymdyq berý maqsaty da joq. Barlyǵyn Prezident sheshedi. Irikteý qatysýshylarynyń bir artyqshylyǵy - osyndai kúrdeli synaqtan ótkeni. Prezident te kúrdeli testileýden ótken qatysýshylardyń qanshalyqty bilikti ekenin biletin bolady. Úzdik shyqqan qatysýshylardy belgili bir qyzmetke májbúrlep taǵaiyndai almaimyz. 18 million halyqqa 300 adam az, bul rezerv 5 jyl saqtalady», - dedi Anar Jaiylǵanova.
Aita keteiik, «Prezidenttik Jastar kadr rezervine» irikteýdiń «Áleýetti baǵalaý» kezeńine 549 qatysýshy ótti. Bul kezeń esse jazý, jobany tanystyrý jáne quzyretti baǵalaý syndy 3 bólikten turady.
«Áleýetti baǵalaý» kezeńinen keiin sarapshylarmen suhbat ótedi. Oǵan aldyńǵy kezeńderde úzdik nátije kórsetken qatysýshylar jiberiledi. Odan keiin Prezident Ákimshiligi quratyn komissiia irikteýdiń aldyńǵy kezeńderinen tabysty ótken árbir úmitkermen jeke áńgimelesedi. Sonyń qorytyndysy boiynsha Ulttyq komissiia eń joǵary ball jinaǵan kandidattardy Prezidenttik jastar rezervine qabyldaý týraly sheshim qabyldaidy.
Irikteýdiń keiingi kezeńderine jiberiletin kandidattardyń shekti sany belgilengen. Atap aitqanda, testileý verifikatsiiasyna 1000 adam ǵana jiberiledi. Kelesi kezeń - áleýetti baǵalaýǵa - 600 adam, saraptamalyq komissiiada suhbattasýǵa - 400 adam, sońǵy Ulttyq komissiia otyrysynda - 330 adamnyń nátijesi qaralady.
