Qazaqstan Prezidentiniń Germaniiaǵa sapary barysynda jalpy quny 2,4 mlrd dollar otyz ekonomikalyq qujatqa qol qoiyldy, dep habarlaidy QazAqparat.
Bul týraly beisenbi keshke jýrnalisterge Kazakh Invest ulttyq kompaniiasynyń basqarma tóraǵasy Baýyrjan Sartbaev qol qoiý rásimnen keiin aityp berdi.
«Memleket basshysynyń Germaniiaǵa resmi sapary aiasynda jalpy quny 2,4 mlrd dollar otyz ekonomikalyq qujatqa qol qoiyldy. Onyń ishinde qaita óńdeý jáne mashina jasaý sekildi salalar bar», - dedi B.Sartbaev.
«Olardyń kóbisi ózara bailanysty jáne joǵary qosymsha quny bar ónimderdi óndiredi», - dep atap ótti Kazakh Invest ulttyq kompaniiasynyń basqarma tóraǵasy.
«Sondai-aq búgin qol qoiylǵan basty qujattardyń biri – Kazakh Invest pen German ekonomikasynyń shyǵys komiteti arasynda investitsiia salasyndaǵy yntymaqtastyqty nyǵaitý jónindegi birlesken jospar. Ol salalardyń basym baǵytyn jáne naqty yntymaqtastyq jobalaryn anyqtaidy», - dep toqtaldy ol.
Aita keterligi, German ekonomikasynyń shyǵys komiteti GFR-dyń Ortalyq, Shyǵys, Ońtústik shyǵys Eýropa, Ońtústik Kavkaz jáne Ortalyq Aziiadaǵy 29 memlekettegi ekonomikalyq múddesine jaýapty.
