QR Ortalyq sailaý komissiiasy QR Prezidenttigine kandidattar arasynda teledidardan ashyq pikirtalas ótkizý múmkinshiligin qarastyryp jatyr.
Bul týraly búgin QR Ortalyq sailaý komissiiasy tóraǵasynyń orynbasary Konstantin Petrov aitty, dep habarlaidy QazAqparat tilshisi.
«Prezidenttikke kandidattar, olardy usynǵan saiasi partiialar Ortalyq sailaý komissiiasy uiymdastyratyn teledidardaǵy sailaý aldyndaǵy pikirtalastarǵa qatysýǵa quqyly. Qazirgi ýaqytta Ortalyq sailaý komissiiasy mundai múmkindikti pysyqtaýda», - dedi ol.
Onyń aitýynsha, memleket sailaý aldyndaǵy úgit júrgizý úshin buqaralyq aqparat quraldaryna qol jetkizýdiń teń sharttaryna kepildik beredi. Ol úshin «Sailaý týraly» Konstitýtsiialyq zańnyń 28-babynyń 3-tarmaǵyna jáne QR OSK-nyń qaýlysymen bekitilgen Kúntizbelik jospardyń 7-tarmaǵyna sáikes efir men baspasóz alańyn berý mólsheri, sharttary men tártibi týraly málimetter tiisti buqaralyq aqparat quralymen 2019 jylǵy 5 mamyrda sailaý aldyndaǵy úgit júrgizý bastalǵanǵa deiin 5 kúnnen keshiktirmei habarlandyrylýy jáne jariialanýy tiis. Sondai-aq OSK-ǵa onyń internet-resýrsynda ornalastyrý úshin usynylýy qajet. Qazirgi ýaqytta OSK-ǵa BAQ-tan 139 aqparattyq habar kelip tústi, barlyq habarlar OSK saitynda ornalastyrylǵan.
«Kandidattarǵa buqaralyq aqparat quraldarynda efir ýaqytyn, baspa alańyn berý týraly sharttyń talaptary qandai da bir kandidatqa, saiasi partiiaǵa basymdyq týǵyzbaýy tiis. Kandidattardyń birine berilgen efir ýaqytyn, baspa alańyn bólýge kelisim berý ózge de kandidattarǵa efir ýaqytyn, baspa alańyn bólýge kelisim berý bolyp tabylady. Kandidattardyń buqaralyq aqparat quraldarynda sóz sóileýiniń kezektiligi jazbasha ótinishterdiń kelip túsý tártibimen nemese ótinishter bir mezgilde túsken jaǵdaida jerebe boiynsha belgilenedi», - dedi K.Petrov.
Onyń sózine qaraǵanda, kandidattardyń sailaý aldyndaǵy úgiti bar merzimdi baspasóz basylymdarynyń, tele-radiohabarlardyń barlyq jariialanymdary qarjylandyrý kózderi týraly aqparatty qamtýy tiis. Prezidenttikke kandidattar buqaralyq aqparat quraldaryna úgit materialdaryn usynǵan kezde olardyń Konstitýtsiia men sailaý zańnamasynyń talaptaryna sáikestigin qamtamasyz etýge qajet.
