Astana International Exchange (AIX) Direktorlar keńesi aktsionerler men retteýshi organdardyń maquldaýymen 23 mamyrdan keiin kúshine enetin AIX basshylyǵynyń qurylymyndaǵy ózgeristerdi jariialady, dep habarlaidy "Ult aqparat".
Direktorlar keńesi qazirgi AIX qarjy direktory Renat Bekturovtyń 2021 jylǵy 24 mamyrda Astana International Exchange basqarma tóraǵasy bolyp taǵaiyndalatynyn habarlady.
Aita keteiik, AIX qazirgi tóraǵasy Tim Bennett Direktorlar keńesiniń tóraǵasy retinde úsh jyldyq merzimge sailandy jáne AIX pen AHQO-nyń kapital naryqtaryn damytý jónindegi aǵa keńesshisi retinde jumysyn jalǵastyrady.
«Tim Bennettiń halyqaralyq tájiribesi men kóshbasshylyq qasietteri kásipqoilardyń úzdik komandasyn jinaýǵa jáne qysqa merzim ishinde sheteldik jáne jergilikti investorlardyń joǵary klasty infraqurylymy men integratsiialanǵan ekojúiesi bar álemdik deńgeidegi alań bolyp úlgergen birja qurýǵa, birneshe ondaǵan listingter ótkizýge jáne innovatsiialyq ónimderdi iske qosýǵa múmkindik berdi. Biz T.Bennettiń kapital naryǵyn damytý jónindegi is-áreketterimizdi odan ári qoldaitynyna senemiz jáne jas basqarýshy Renat Bekturovqa AIX-ti odan ári damytý mindetin laiyqty atqarýǵa tilektespiz. Ótken jyly Renat Bekturov Prezidenttik jastar kadr rezervine alyndy, bul onyń Qazaqstannyń bolashaq kóshbasshylarynyń biri retindegi áleýetin kórsetedi», - dep pikir bildirdi AHQO basqarýshysy Qairat Kelimbetov.
Sonymen birge, AIX Direktorlar keńesiniń tóraǵasy Nurlan Qusaiynov Renat Bekturovtyń AHQO qurylǵan 2016 jyldan beri jumys isteitinin jáne 2017 jyldan beri – AIX qarjy direktory ekenin atap ótti. Nurlan Qusaiynov AIX direktory, Direktorlar keńesiniń múshesi bolyp qalady.
