QR Qarjy naryǵyn retteý jáne damytý agenttigi kásipkerlerdi jeńildikpen nesieleý baǵdarlamasy aiasynda qarajattyń igerilýi barysyn qadaǵalaýda.
«Ekinshi deńgeidegi bankterden alynǵan derekterge sáikes, shaǵyn jáne orta biznes sýbektileri men dara kásipkerler kredit alý úshin 274,8 mlrd teńge somaǵa 1 313 ótinim berdi. Onyń ishinde 62,5 mlrd teńge somaǵa 246 qaryz maquldanǵan», - delingen agenttik málimetinde.
Aita keteiik, Qazaqstan Prezidenti Qasym-Jomart Toqaevtyń tapsyrmasy boiynsha Ulttyq banki Qarjy naryǵyn retteý jáne damytý agenttigimen birlesip, Shaǵyn jáne orta kásipkerlik sýbektilerin jeńildikpen kreditteý baǵdarlamasyn ázirledi.
Osy baǵdarlamany iske asyrý úshin shaǵyn, orta kásipkerlik sýbektilerine jáne dara kásipkerlerge ekinshi deńgeidegi bankterge negizdelgen salymdar ornalastyrý arqyly 600 mlrd teńge bólindi.
Biznesti qoldaý tetigi ekinshi deńgeidegi bankterdiń tótenshe jaǵdaidy engizý nátijesinde zardap shekken shaǵyn jáne orta kásipkerlik sýbektilerine, dara kásipkerlerge ainalym kapitalyn tolyqtyrý úshin 12 aiǵa deiingi merzimge jyldyq 8 paiyzdan aspaityn mólsherleme boiynsha jeńildikpen nesie berýi arqyly iske asyrylady. Ekinshi deńgeidegi bankterdiń qarajatty igerý merzimi - 3 ai.
