Elorda ákimdigi jáne Nur Otan partiiasy kirisinen aiyrylǵan azamattarǵa kómektesýdi jalǵastyrýda, dep habarlaidy Nur-Sultan qalasy ákimdiginiń resmi saity.
28 sáýirge deiin 42,5 myń teńge áleýmettik tólemdi 275 myńnan astam azamat aldy. Áleýmettik tólemdi alýǵa barlyǵy 594,7 myńnan astam adam ótinim berdi. 301 myń ótinim keri qaitaryldy. Sonymen qatar Nur-Sultanda «Biz birgemiz» aktsiiasy aiasynda kómek kórsetýdiń ekinshi kezeńi bastaldy, onymen 28 073 adam qamtylady, dep málimdedi seisenbide ortalyq kommýnikatsiialar qyzmetinde ótken brifingte qala ákiminiń orynbasary Baqtiiar Maken.
«Elbasynyń bastamasymen bastalǵan «Biz birgemiz» aktsiiasynyń sheńberinde elordada 19 naýryz ben 23 sáýir aralyǵynda áleýmettik osal topqa jatatyn 14 478 otbasyǵa Nur Otan partiiasynan 50 000 teńgeden áleýmettik kómek kórsetildi. Partiia, biznesmender men qaiyrymdy azamattardyń kúshimen 11 000 azyq-túlik jiyntyǵy tapsyryldy. Naýryz aiynyń sońynan búginge deiin 1,5 million antiseptikalyq maska úlestirildi. Jalpy, qalada túrli áleýmetik jumystarǵa qalalyq shtabtan 500 erikti jumyldyryldy», – dep atap ótti B.Maken.
Aita keteiik, memleket basshysynyń tapsyrmasyna sáikes, TJ kezinde kirisinen aiyrylǵan azamattarǵa áleýmettik kómek kórsetý jumysy jalǵasýda. Habarlanǵandai, Uly Otan soǵysyndaǵy Jeńistiń 75-jyldyǵyn merekeleý aiasynda qalada UOS ardagerlerine 1 mln. teńgeden tólem berile bastady.
Búgingi kúni elordada Uly Otan soǵysynyń 44 ardageri bar. Bir rettik aqshalai tólemderdi tyl eńbekkerleri, qaitys bolǵan Uly Otan soǵysynyń qatysýshylary men múgedekteriniń áielderi, sondai-aq Uly Otan soǵysynyń ardagerlerimen jeńildikter men kepildikter boiynsha teńestirilgen barlyq adamdar alady.
