Batys Qazaqstan oblysynda 133 myń adamǵa 42 500 teńgeden áleýmettik kómek berildi, dep habarlaidy "Ult aqparat".
Oblys ákimi Ǵali Esqalievtiń aitýynsha, Memleket basshysynyń tapsyrmasyna sáikes tótenshe jaǵdai kezinde óńirde tabysyn joǵaltqan osynshama adam áleýmettik kómek aldy.
Bul – oblys turǵyndarynyń 22 paiyzy.
«Eger tótenshe jaǵdai aldaǵy mamyr aiynda da jalǵasatyn bolsa, sol adamdarǵa atalmysh áleýmettik kómek tólenedi. Ol úshin qaitadan ótinim berýdiń qajeti joq, jumys avtomatty túrde jasalady», dedi óńir basshysy.
Oblys ákimi sonymen qatar «Biz birgemiz» qory arqyly óńirde 14 myńdai adamǵa 50 myń teńgeden járdem beriletinin jetkizdi.
«Oblysta kúni búgin 5,5 myńdai adam 50 myń teńgeni aldy. Aldaǵy aptada qordan taǵy da qosymsha qarjy keledi. Taǵy 8 myńdai adam kómekke qol jetkizedi. Qazirgidei qysyltaiań kezde qolushyn sozyp jatqan kásipkerler, el azamattary bizdiń oblysymyzda da az emes. Olardyń bárine alǵysymyzdy bildiremiz», dedi ákim.
Eske sala keteiik, budan buryn Batys Qazaqstanda 40 myńdai adamǵa kommýnaldyq jeńildik kórsetiletinin jazǵan bolatynbyz.
