QR Aqparat jáne qoǵamdyq damý ministri Dáýren Abaev Prezidenttik kadrlyq rezervti jasaqtaý týraly aitty, dep habarlaidy QazAqparat.
«Memlekettik qyzmet isteri agenttiginiń tóraǵasy Anar Jaiylǵanova búgin baspasóz máslihatyn ótkizip, kóptiń kókeiindegi suraqtardyń barlyǵyna tolyqqandy jaýap bergen bolatyn. Ne qosýǵa bolady? Eń aldymen, bul rezervke ótinimdi 13 myńnan astam azamat bergenin atap ótkim keledi. Bul – Prezident usynǵan ideianyń qoldaý tapqanyn dáleldeitin óte úlken kórsetkish. Adamdar oǵan senip otyr. Mundai tártipte birinshi ret konkýrs ótkizilýde. Memleket basshysynyń rezervinde bolý degen – zor qurmet. Sol sebepti, qazirdiń ózinde aitarlyqtai salmaqty laýazymda otyrǵan azamattar da óz ótinimin berip jatyr. Alaida laýazymdylar jappai rezervke kirýge niet bildirip otyr dep taǵy aita almaimyz», - dedi Dáýren Abaev «Habar» arnasyndaǵy «Ashyq dialog» baǵdarlamasynda.
Ministrdiń aitýyna qaraǵanda, rezervtiń kelesi kezeńine ótken azamattardyń kóbi - laýazymy joqtar.
«Tipti olardyń 80 paiyzynyń memlekettik qyzmetke múlde qatysy joq. Bul óte jaqsy kórsetkish dep aitar edim. Qazaqstan úshin ǵana emes, kez kelgen memleket úshin mundai kórsetkish úzdik sanalary anyq. Sebebi bul – belsendiliktiń kórsetkishi. Azamattar áleýmettik liftke senedi. Kúrdeli suraqtarǵa keletin bolsaq, bul onsyz da kóptiń kútken saýaldary edi. Eshkim de ońai jol bolaryna ýáde bergen joq. Stavka tym joǵary. Bul konkýrsta báseke qyzý ekenin uǵyný kerek. Sondyqtan, eshkim de rezerv jaily syni sóz aitpasa da, birtúrli bolar edi. Biraq, men eń bastysy – nátije dep aitar edim. Eger búkil Prezidenttik kadrlyq rezerv arqyly eldi alǵa jetelei alatyn eń úzdik 10 basqarýshyny tańdap alsaq, onyń ózi úlken jetistik bolmaq. Sondyqtan, nátijege qarai syn aitsańyzdar deimin. Al nátijeniń bolaryna anyq senemin, sebebi bul jumystardyń barlyǵy Prezidenttiń tikelei baqylaýynda», - dedi Dáýren Abaev.
Eske sala ketsek, búgin Úkimet úiinde QR Memlekettik qyzmet isteri agenttiginiń tóraiymy Anar Jaiylǵanova baspasóz máslihatyn ótkizip, «Prezidenttik Jastar kadr irikteý qalai júrgizilip jatqanyn tolyqqandy aityp bergen bolatyn.
