Elorda ákimi Altai Kólginov Prezidenttik kadrlyq rezervke engen jastarmen kezdesti, dep habarlaidy QazAqparat.
Kezdesý barysynda qalany damytýdyń negizgi baǵyttary, onyń ishinde ýrbanistika, tehnologiialardy kommertsiialandyrý, sondai-aq «qarapaiym zattar ekonomikasy» baǵdarlamasyn damytý máseleleri talqylandy.
«Búgin Qasym-Jomart Kemeluly rezervke ótken mamandarmen kezdesý barysynda memlekettik apparatty odan ári damytý týraly birqatar tapsyrma júktedi. Qazirgi – tórtinshi tehnologiialyq revoliýtsiia zamanynda bizge jańasha oilaityn, pragmatik mamandar qajet. Tsifrlandyrý dáýirinde memlekettik qyzmetker atalmysh qasietterge ie bolýy tiis. Memlekettik apparattyń negizgi mindetteriniń biri »Halyq únine qulaq asatyn memleket« tujyrymdamasyn júzege asyrý bolyp tabylady. Bizdiń mindetimiz – halyqpen keri bailanysty nyǵaityp, azamattardyń ózekti saýaldaryna jedel jaýap berý. Prezidenttik kadrlyq rezerv – bul meritokratiia qaǵidatyna sáikes keletin jastarǵa arnalǵan áleýmettik lift. Jastardy qoldap, adami kapitaldy damytý – basty mindetterimizdiń biri bolyp tabylady. Sizderdi qalalyq ákimdikke jumysqa shaqyramyn. Bilimdi jáne kreativti jastar úshin esigimiz árqashan ashyq. Sizder birneshe kezeńnen turatyn sapaly irikteýden óttińizder. 13 myń úmitkerdiń 300-i rezervke endi», - dedi qala ákimi Altai Kólginov.
Elorda basshysy jastarǵa elimizdiń órkendeýi jolynda adal eńbek etip, óskeleń urpaqqa úlgi bolýlaryn tiledi.
Nur-Sultan qalasynyń ákimdiginen málim etkendei, Prezidenttik jastar kadrlyq rezervine engen jastarmen kezdesýler aldaǵy ýaqytta da ótetin bolady.
«Qansha mamannyń keletini taǵaiyndaýlardan keiin jariialanatyn bolady», - dedi vedomstvonyń baspasóz qyzmetinen.
Aita keteiik, Prezidenttik jastar kadrlyq rezervi Memleket basshysy Qasym-Jomart Toqaevtyń tapsyrmasyna sáikes quryldy. Búgin Prezident kadrlyq rezervke ótken 300 jaspen kezdesti.
