Qazaqstanda Prezidenttik jastar kadr rezervine kandidattardy irikteýdiń ekinshi kezeńi bastalady, dep habarlaidy "Ult aqparat".
«Prezident janyndaǵy jastar kadr rezevriniń ulttyq komissiiasy ekinshi kezeńdi ótkizý, rezervterdi irikteý men onyń josparyn bekitti. Rezervterdi irikteý aldaǵy 1 qyrkúiekte bastalady. Sonyń nátijesinde memlekettik sektor úshin 50 jas rezerv tańdap alynady», - dedi QR Memlekettik qyzmet isteri agenttiginiń tóraǵasy Anar Jaiylǵanova OKQ-de onlain ótken baspasóz máslihatynda.
Sondai-aq, agentttik basshysy kandidattarǵa qoiylatyn negizgi talaptarmen tanystyrdy.
«Kandidattarǵa qoiylatyn negizgi talaptar sol burynǵysynsha, Qazaqstan Respýblikasynyń azamaty bolýy tiis, jasy 35-ten aspaýy kerek, joǵary bilimi bar jáne eńbek ótili 5 jyldan kem bolmaýy qajet. Osy jolǵy jastar rezevterinen bilim men daǵdydan bólek, qoǵamdaǵy máselelerden habardar bolyp, ony sheshýge qyzyǵýshylyq tanytýy joǵary baǵalanady. Sonymen qatar arnaiy tapsyrmalar berilip, kandidattardyń bilim-biligi jańasha baǵalanady. Irikteý kezeńine Memleket basshysy buǵan deiin saiasi, memlekettik qyzmet, ákimshilik korpýs qyzmetine taǵaiyndaǵan qyzmetshiler qatysa almaidy. Prezidenttik jastar kadr rezevrinde buryn bolǵan azamattardyń qatysýyna bolmaidy», - deidi ol.
Onyń aitýynsha, irikteýden ótkender Prezidenttik jastar kadr rezervinde 3 jylǵa deiin bola alady.
«Irikteýden ótken mamandar memlekettik qyzmetke zań aiasynda sailanyp, taǵaiyndalatyn bolady. Eger kez kelgen memlekettik qyzmetke jastar kadr rezervinde joq mamannyń kanditatýrasy kelip tursa, ol qyzmetke jastar kadr rezervindegi mamandy taǵaiyndaý mindetti emes», - dedi Jaiylǵanova.
