Elordada Prezidenttik jastar kadrlyq rezervi forýmy bastaldy. QR Prezidentiniń kómekshisi Erlan Qarin Qasym-Jomart Toqaevtyń quttyqtaý hatyn oqyp berdi, dep habarlaidy QazAqparat.
«Qurmetti dostar! Barshańyzdy Prezidenttik jastar kadrlyq rezervi forýmynyń ashylýymen quttyqtaimyn. Bul – júzden júirik, myńnan tulpar shyqqan úzdikterdiń basqosýy. Men jas urpaqtyń eldik múddege berik, memleketshil tulǵa bolyp ósýine basa mán beremin. Bilimdi de bilikti, belsendi ári otanshyl órenderge jol ashý – mańyzdy mindetterdiń biri. Biz olardyń jaýapty qyzmet atqaryp, shyńdala túsýine tolyq jaǵdai jasaimyz», - delingen Prezident quttyqtaýynda.
Prezident memlekettik basqarý isindegi sabaqtastyqty saqtai otyryp, basshylardyń jańa shoǵyry qalyptastyrylatynyn, sol úshin arnaiy qurylǵan komissiia konkýrs jariialap, ańdaýly 300 adamdy iriktep alǵanyn eske saldy.
«Men baiqaý jeńimpazdarymen byltyr qańtar aiynda kezdestim. Aldaǵy mindetter týraly oiymdy ortaǵa salyp, baǵyt-baǵdar berdim. Sodan beri kópshiligińiz túrli laýazymǵa taǵaiyndaldyńyzdar. Biyl aralaryńyzdan Májiliske eki depýtat sailandy. Sonymen birge, eki azamat Ulttyq qoǵamdyq senim keńesine múshe boldy. Óńirlerge baryp eńbek etip júrgen qyz-jigitterdi de bilemin. Jas mamandardyń elmen etene jumys isteýi – quptarlyq qadam. Sebebi bul – naǵyz ómir mektebi», - deidi Memleket basshysy.
Q. Toqaev jastardyń jan-jaqty izdenip, aýqymdy bastamalar men naqty jobalar usynǵanyn atap ótti.
«Munyń bári jas órkeniń áleýeti qanshalyqty zor ekenin kórsetedi. Prezidenttik kadr rezervinde bolý – talapty jastar úshin taptyrmas múmkindik ekeni anyq. Alaida ony bilikke jetýdiń emes, halyqqa qyzmet etýdiń tóte joly dep bilý kerek. Shyn máninde eń úlken mártebe de, abyroi da osynda. Biyl qasterli Táýelsizdigimizge 30 jyl tolady. Sizder – erkin elde týyp-ósken rýhy azat, sanasy ashyq azamatsyzdar. Qazaqstandy odan ári órkenderý – ózderińizge júkteletin úlken jaýapkershilik. Osy oraida óskeleń urpaq el úmitin aqtaidy dep senemin. Barshańyzǵa myqty densaýlyq, baq-bereke tileimin. Forýmnyń jumysy tabysty bolsyn», - deidi Qasym-Jomart Toqaev.
