30 qyrkúiekte Prezidenttik jastar kadr rezervine qatysýshylardy tirkeý aiaqtalady. Bul týraly QR Memlekettik qyzmet isteri agenttiginiń baspasóz qyzmeti málimet taratty.
«Qujattardy qabyldaý 1 qyrkúiekte onlain rejimde pkrezerv.gov.kz platformasynda bastalǵan bolatyn. Memleket basshysynyń tapsyrmasy boiynsha, biyl Prezidenttik Jastar kadrlyq rezervine 50 jas maman irikteledi. Mundaǵy maqsat – jaýapkershilikti óz moinyna alýǵa daiyn jáne qiynnan qiystyryp, tiimdi sheshim qabyldaýdan qoryqpaityn, eń bastysy, qoǵam múddesin basshylyqqa alatyn jas talanttardy anyqtap, memlekettik qyzmetke tartý», - dep jazady agenttiktiń baspasóz qyzmeti.
Aita ketý kerek, konkýrsqa 35 jastan aspaǵan, joǵary bilimi, keminde bes jyl jumys ótili bar, memlekettik tildi keminde orta deńgeide meńgergen Qazaqstan azamattary qatysa alady.
Resmi organ málimeti boiynsha, búginde rezervke múshelike ótkisi keletin 329 áiel men 662 er adamnan 991 ótinim kelip túsken. Ázirge niet bildirýshilerdiń sany boiynsha Nur-Sultan jastary alda tur – 198 adam. Ekinshi orynda 166 úmitkermen Almaty oblysy tursa, aldyńǵy úshtikti 129 ótinish joldaǵan Qostanai oblysy túiindegen.
