Ekologiia, geologiia jáne tabiǵi resýrstar ministri Serikqali Brekeshev "Prezidentten sógis alǵannan keiin otstavkaǵa ketesiz be" degen suraqqa jaýap berdi, dep habarlaidy Sputnik Qazaqstan.
"Buǵan qatysty men sheshim qabyldamaimyn. Otstavkaǵa jiberý týraly sheshimdi el basshylyǵy qabyldaidy", - dedi ol Ortalyq kommýnikatsiialar qyzmetinde ótken baspasóz máslihatynda.
Sondai-aq jýrnalister ministrden bes baldyq shkala boiynsha óz jumysyn qalai baǵalaitynyn surady.
"Bizdiń jumysymyzǵa da el basshylyǵy baǵa beredi", - dep qysqa qaiyrdy ol.
Aita keteiik, 14 shildede ótken Úkimettiń keńeitilgen otyrysynda Prezident Qasym-Jomart Toqaev Serikqali Brekeshevke geologiia jáne bioaýlantúrlilik salasyndaǵy sapasyz oryndalǵan jumysy úshin sógis jariialady.
Memleket basshysy ekologiia ministriniń mineraldyq resýrstar derekteriniń tsifrlyq bankin qurý jáne kiikter popýliatsiiasyn retteý jónindegi tiimsiz jumysyn synǵa aldy. Prezident kiikter sanyn retteý máselesin aqylǵa salyp sheshýdi talap etti.
"Kiik – qazaq úshin kieli janýar. Tabiǵi landshafttan 80 myń kiikti joiý, iaǵni atý usynyldy. Máseleni sheshýdiń basqa da joldary bar emes pe? Mamandarmen aqyldasyńyz. Bul aqyrǵy shara bolýǵa tiis. Bálkim, buǵan da júginermiz. Biraq, bul amalsyz shara bolýy kerek ekenin eskertemin. Osy máseleni kásibi turǵydan qarastyrý qajet", – dedi Toqaev.
Osy synnan keiin Serikqali Brekeshev Zoologiia institýty kiikter sanyn retteý boiynsha tereń ǵylymi zertteý júrgizetinin málimdedi. Ministrdiń aitýynsha, ǵylymi zertteý bir-eki jylǵa sozylýy múmkin. Onyń qorytyndysy shyqpaǵanǵa deiin popýliatsiiany retteý máselesine qatysty sheshim qabyldanbaidy.
