QR Parlamenti Senatynyń otyrysynda «Qazaqstan Respýblikasynyń Qaýipsizdik Keńesi týraly» zańynyń jobasy qabyldandy, dep habarlaidy Baq.kz tilshisi.
Atalǵan qujatty depýtattarǵa Ádilet ministri Marat Beketaev tanystyrdy.
«Zań jobasy Qazaqstan Respýblikasy Qaýipsizdik Keńesiniń quqyqtyq mártebesin, quzyretin jáne qyzmetiniń uiymdastyrylýyn aiqyndaidy. Osylaisha, zań jobasymen Qaýipsizdik Keńesin úilestirýshi konstitýtsiialyq organ retinde taný usynylady», - dedi ol.
Ministrdiń aitýynsha, zań jobasy 3 taraýdan turady.
«Birinshi taraý, Qaýipsizdik Keńesiniń quqyqtyq mártebesin, qyzmetiniń negizderin, mindetteri men fýnktsiialaryn aiqyndaidy. Qaýipsizdik Keńesiniń mindetterine: eldiń ulttyq qaýipsizdigin, qorǵanys qabiletiligin qamtamasyz etý boiynsha memlekettik saiasattyń baǵyttaryn qaraý; sol baǵyttar boiynsha memlekettik organdar men uiymdardyń qyzmetin úilestirý jatady. Sonymen qatar, Qazaqstan Respýblikasynyń zańnamasyna jáne Qaýipsizdik keńesi tóraǵasynyń sheshimderine sáikes basqa da mindetter qarastyrylady», - dedi basshy.
Keiin Marat Beketaev zańnyń ekinshi taraýy Qaýipsizdik Keńesiniń quramyn, onyń tóraǵasy men músheleriniń ókilettigin, onyń qyzmetin aiqyndaitynyn jetkizdi.
«Atap aitqanda, kelesi ókilettikterdi bekitý usynylady: Qaýipsizdik Keńesiniń qyzmetin basqarýdy júzege asyrý; onyń otyrystary men jedel keńesterin shaqyrý; Qaýipsizdik Keńesi týraly erejeni bekitý; zańnamada kózdelgen ózge de ókilettikterdi júzege asyrý. Qaýipsizdik Keńesiniń qyzmetin aqparattyq-taldamalyq jáne uiymdastyrýshylyq jaǵynan qamtamasyz etýdi Qaýipsizdik Keńesiniń tóraǵasyna baǵynatyn jáne esep beretin Qaýipsizdik keńesiniń apparaty júzege asyrady», - dedi ministr.
Beketaevtyń aitýynsha, atalǵan qujattaǵy úshinshi taraý Qaýipsizdik keńesi men Qaýipsizdik keńesi apparatynyń qyzmetin qarjylandyrý máselelerin, sondai-aq zańnyń kúshine ený tártibin retteidi.
Tiisti talqylaýdan keiin depýtattar atalǵan zań jobasyn qabyldady.
Aita keteiik, atalǵan zań jobasy Elbasy Nursultan Nazarbaevqa ómir boiy basqarýǵa múmkindik beredi. Endi atalǵan qujat prezidenttiń qaraýyna jiberiledi.
