Qazaqstan Prezidenti Qasym-Jomart Toqaev Eýraziialyq damý bankiniń basqarma tóraǵasy Nikolai Podgýzovty qabyldady. Bul týraly Aqordanyń baspasóz qyzmeti habarlady.
Kezdesý barysynda Memleket basshysyna Eýraziialyq damý bankiniń atqarǵan jumystarynyń nátijeleri men orta merzimdegi josparlary týraly, sondai-aq aldaǵy kezeńge arnalǵan makroekonomikalyq boljamdary jóninde málimet berildi. Bank sarapshylary Qazaqstandaǵy ekonomikalyq ósimniń oń qarqyny Eýraziialyq ekonomikalyq odaqqa múshe eldermen salystyrǵanda eń joǵary deńgeide bolady dep boljap otyr.
Sonymen qatar Qasym-Jomart Toqaev Eýraziialyq damý bankiniń 2022-2026 jyldarǵa arnalǵan Strategiiasynyń negizgi baǵyttarymen tanysty. Atap aitqanda, Nikolai Podgýzov Prezidentke Qazaqstan men Eýraziialyq ekonomikalyq odaqqa múshe basqa de elderdiń áleýmettik-ekonomikalyq damýyna yqpal etetin mańyzdy megajobalar týraly aitty.
Bank «Soltústik – Ońtústik», «Eýropa – Batys Qytai» kólik dálizderin ashýǵa baǵyttalǵan jobalardy júzege asyrýǵa, biryńǵai taýar ótkizý jelilerin qurýǵa jáne Ortalyq Aziia sý-energetikalyq keshenin jańǵyrtýǵa kómektesýge nietti. Eýraziialyq damý banki atalǵan jobalarǵa 1,2 milliard dollar kóleminde investitsiia quiýdy josparlap otyr. Jalpy bank 2026 jylǵa deiin Qazaqstan ekonomikasyna kem degende 3,8 milliard dollar investitsiia salýǵa nietti.
Memleket basshysy Eýraziialyq damý bankiniń integratsiialyq úderisterdi damytýdaǵy belsendi rólin atap ótip, Qazaqstanǵa jáne Eýraziialyq ekonomikalyq odaqqa múshe basqa da elderge qatysty jobalardy júzege asyrýdyń mańyzdy ekenin aitty.
