Búgin Memleket basshysy Qasym-Jomart Toqaevtyń Qazaqstan halqyna Joldaýyn tyńdai otyryp, elimiz úshin asa mańyzdy jańa baǵyttar aiqyndaldy. Prezident kótergen máselelerdiń ózegi – ádiletti qoǵam qurý, ekonomika men bilimdi jańa satyǵa shyǵarý, zamanaýi tehnologiiany batyl engizý. Bul týraly Arman-PV baspasynyń bas direktory Didara Alina aitty, dep habarlaidy Ult.kz.
Bilim jáne jasandy intellekt
Joldaýda erekshe nazar aýdarylǵan salalardyń biri – bilim. Prezident jasandy intellektini meńgerý mektep qabyrǵasynan bastalýy qajet ekenin naqty atap ótti. Bul — biz úshin ǵana emes, urpaqtyń bolashaǵy úshin de tarihi sheshim. Arnaiy oqý baǵdarlamalary men oqý materialdarynyń ázirlenýi, ustazdardyń AI daǵdylaryn qalyptastyrýy – elimizdiń bilim júiesin túbegeili jańartýǵa jasalǵan naqty qadam. «Qazaq Digital Mektebi» úlgisiniń qolǵa alynýy aýyldaǵy oqýshylarǵa da sapaly bilim alýǵa teń múmkindik beretinin qýana qoldaimyn.
Arman-PV baspasy bul jumysty áldeqashan bastap ketken. Biz Ekitap.kz platformasy men ArmanAI jobasyn damytyp, jasandy intellektini bilim berý protsesine naqty engizip jatyrmyz. Prezidenttiń búgingi bastamalary bizdiń osy eńbegimizdi jalǵastyrýǵa jańa serpin beredi.
Sý resýrstary jáne jahandyq quzyretter
Prezident búgin sý máselesine de toqtaldy. Sý tapshylyǵy – tek ekonomikalyq emes, bolashaqtaǵy áleýmettik turaqtylyqqa áser etetin mańyzdy taqyryp. Bul máseleni sheshý úshin qoǵamda jańa ekologiialyq mádeniet qalyptastyrý qajet.
Arman-PV baspasynda daiyndalǵan «Jahandyq quzyretter» oqýlyǵynda osy taqyryp tereń zerttelip, oqý baǵdarlamasyna engizildi. Óitkeni, sýdyń qundylyǵy men ony uqypty paidalaný qajettigin árbir bala mektep qabyrǵasynan bastap bilýi tiis dep esepteimin.
Ekonomika jáne kásipkerlik
Joldaýda aitylǵan taǵy bir mańyzdy tus – investitsiialyq ahýaldy jaqsartý jáne kásipkerlikke qoldaý. Investitsiialyq shtab pen jańa tsifrlyq platformalar biznestiń damýyna jańa arna ashady. Ásirese, shaǵyn jáne orta bizneske kórsetiletin qoldaý – eldiń ekonomikalyq turaqtylyǵynyń kepili.
Degenmen, Prezident aitqandai, reformalardyń baiaý júrýi men biýrokratiialyq kedergiler áli de sheshimin tabýy tiis. Bul syn oryndy. Memleket tarapynan qoiylǵan mindetterdiń oryndalýy naqty nátijemen kórinýi – biznes qaýymdastyǵy úshin sheshýshi faktor.
Áleýmettik jaýapkershilik jáne ádilettilik
Joldaýda áleýmettik ádilettilik máselesi de keńinen qozǵaldy. Ekonomikalyq reformalar halyqtyń kúndelikti ómirine oń áser etýi úshin ádildik qaǵidasy basty ólshem bolýy tiis. Bul qaǵidany árbir biznes ókili, sonyń ishinde bizdiń sala da basshylyqqa alýy kerek.
Qorytyndy
Prezidenttiń Joldaýy – tek memlekettik jospar emes, árbirimizge baǵyt-baǵdar beretin strategiialyq qujat. Onda bilim salasyna jasandy intellektini engizý, sý resýrstaryn uqypty paidalaný mádenietin qalyptastyrý, kásipkerlikke jańa múmkindikter ashý, áleýmettik ádilettilikti nyǵaitý sekildi úlken mindetter qoiyldy.
Arman-PV ujymy osy mindetterdi júzege asyrý jolynda óz úlesin qosa bermek. Bizdiń basty maqsatymyz – jańa dáýirdiń bilimdi, oily, jaýapty azamatyn qalyptastyrýǵa atsalysý.
