2020 jyldyń 1 qyrkúieginde QR Prezidenti Qasym-Jomart Toqaev pandemiiadan keiingi daǵdarysqa bailanysty shaǵyn jáne orta bizneske júieli qoldaý sharalaryn kórsetýdi tapsyrdy, dep habarlaidy QazAqparat.
Ulttyq ekonomika ministrliginiń habarlaýynsha, biyl shaǵyn jáne orta biznesti jeńildikpen kreditteý jumystary «Biznestiń jol kartasy 2025», «Qarapaiym zattar ekonomikasy», «Eńbek» jáne «Jumyspen qamtýdyń jol kartasy» baǵdarlamalary, sondai-aq ainalym kapitalyn tolyqtyrýǵa Ulttyq banktiń jeńildikpen kreditteý baǵdarlamasy sheńberinde jalǵasýda.
Atap aitqanda, kreditter boiynsha jyldyq mólsherleme 6%-dy quraidy, ainalym kapitalyn tolyqtyrýdy qarjylandyrý men kreditter somasy ulǵaityldy, mikro jáne shaǵyn kásipkerlik sýbektilerine qoljetimdi mikrokredit berý iske qosyldy.
Vedomstvo usynǵan aqparatqa sáikes, biylǵy birinshi jartyjyldyqta 31 myńnan astam joba 1 trln teńgeden astam somaǵa jeńildikti qarjylandyrý alǵan. Ekonomikanyń zardap shekken sektorlaryndaǵy kásipkerlerdi qoldaý úshin shaǵyn jáne orta kásipkerlik kreditteri qaita qarjylandyrylýda. Ekonomikalyq qyzmet túrleriniń tizbesi keńeitilip, sýbsidiialaý merzimi 3 aiǵa uzartyldy. Osy sharalarǵa biýdjetten 18,4 milliard teńge bólingen.
Biylǵy shilde aiynda «Biznestiń jol kartasy» jáne «Qarapaiym zattar ekonomikasy» baǵdarlamalary sheńberinde jańa biznes jobalaryn sýbsidiialaý úshin biýdjetten qosymsha 13,2 milliard teńge bólindi. Eki baǵdarlamany qarjylandyrýdyń jalpy kólemi 186,3 milliard teńge boldy. Sonymen birge, shilde aiynda «Jumyspen qamtýdyń jol kartasy» baǵdarlamasy aiasynda «Bastaý-Biznes» jobasynyń túlekterine shaǵyn nesie berý bastaldy. Oǵan 22,5 milliard teńge bólindi. Aýyldaǵy óz kásibin jańadan bastaityn kásipkerlerdiń 5 myńdai jobasyn qarjylandyrý josparlanýda.
Sonymen birge, birinshi jartyjyldyq qorytyndysy boiynsha «Biznestiń jol kartasy 2025» jáne «Qarapaiym zattar ekonomikasy» baǵdarlamalary aiasynda jalpy somasy 441 milliard teńgege 12 447 joba sýbsidiialandy. 187 milliard teńge bolatyn 10 788 jobaǵa kepildik berildi. Agrarlyq nesie korporatsiiasy sheńberinde 5,9 milliard teńge bolatyn 134 jobaǵa qoldaý kórsetildi.
Jyl basynan beri nesielerdi sýbsidiialaý quraly boiynsha eń kóp qoldaý kórsetilgen jobalar Nur-Sultan, Almaty qalalarynda jáne Jambyl oblysynda baiqaldy. Kepildik berý quraly boiynsha jobalardyń basym bóligi Jambyl, Túrkistan oblystarynda jáne Nur-Sultan qalasynda qoldaý tapty.
«Atameken» Ulttyq kásipkerler palatasy 50 myńnan astam kásipkerlik sýbektilerine saýalnama júrgizip, shaǵyn jáne orta biznesti qoldaý boiynsha jańa sharalar paketin ázirledi. Atap aitqanda, 2021 jylǵa arnalǵan ekonomikalyq ósýdi qalpyna keltirý boiynsha ózekti keshendi jospar iske asyrylýda. Bul keshendi jospar 60-tan astam qoldaý sharalaryn iske asyrýdy, onyń ishinde bizneske júktemeni azaitý, suranys naryqtaryna qoljetimdilikti qamtamasyz etý, jańa retteýshilik saiasatty engizýdi kózdeidi.
Biylǵy 1 qańtardan bastap, zardap shekken salalarda túsken tabystyń 3 paiyz mólsherlemesimen bólshek salyqtyń jańa arnaiy rejimi engizildi. Al 1 sáýirden 1 shildege deiin eńbekaqy tóleý qorynan zardap shekken salalarda salyqtardy tóleýdi keiinge qaldyrý usynyldy. 1 shildeden bastap jańadan qurylǵan óndiristik kompaniialar úshin 70 paiyz mólsherinde qosylǵan qun salyǵy boiynsha qosymsha esepke alý quqyǵy berildi. Usynylǵan qorǵaý quraldarynyń quny arqyly kásipkerlik sýbektileriniń qyzmetkerleri jeke tabys salyǵynan bosatyldy.
Sonymen birge, kelesi jyldan bastap biznesti jańa negizgi qorlarǵa qaita investitsiialaýǵa paidalanylatyn korporativtik tabys salyǵynan bosatý jónindegi sharalar kózdelgen. Bizneske júktemeni túbegeili tómendetý, ońtaily jáne tiimdi rettegish júieni qalyptastyrý maqsatynda kásipkerlik qyzmetti «taza paraqtan» retteý tásilderi jasalýda. Olar memleket pen kásipkerliktiń ózara is-qimylynyń bazalyq qaǵidattaryn jetildirýdi kózdeidi. Qazirgi ýaqytta tiisti Zań jobasy Parlamentte qaralýda.
