Qasym-Jomart Toqaev Qaraǵandy oblysyna jumys sapary barysynda Jezqazǵan qalasyndaǵy daryndy balalarǵa arnalǵan mamandandyrylǵan «Órken» mektep-internatyna bardy, dep habarlaidy "Ult aqparat" Aqordaǵa silteme jasap.
Prezident zamanaýi quraldarmen jabdyqtalǵan «Órken-media», ólketaný, dombyra jáne art-stýdiia kabinetterin aralap kórip, pedagogtarmen jáne oqýshylarmen áńgimelesti.
– Ǵylym, bilim degen óte mańyzdy. «Bilimdi myńdy jyǵady» degen danalyq sóz bar. Bilim – qazirgi aýmaly-tókpeli zamanda eń kúshti, eń tiimdi qural. Bilimdi bolsań, barlyq qiyndyqtardy eńseresiń. Mindetti túrde. Sondyqtan bizdiń memleketimizdiń úlgili, laiyqty, abyroily azamattary bolyńdar. Elimizdiń bolashaǵy senderdiń qoldaryńda, – dedi Memleket basshysy.
«Órken» mektep-internatynyń oqýshylary ólketaný kabinetinde Ulytaý óńiri men Saryarqanyń tarihy, qasietti oryndary týraly oqidy. Qasym-Jomart Toqaev týǵan ólkeniń jáne qazaq halqynyń tarihyn bilýdiń mańyzdy ekenin atap ótti.
900 oryndyq qazaq tilinde oqytatyn oqý ordasy 2020 jyly salynǵan. Mektep-internatta jaratylystaný jáne matematikalyq baǵyt boiynsha kásibi baǵdarǵa negizdelgen salalyq bilim berý baǵdarlamalary oqytylady.
Bilim berý modelderin júzege asyrý úshin E.A.Bóketov atyndaǵy Qaraǵandy ýniversitetimen, Ó.Baiqońyrov atyndaǵy Jezqazǵan ýniversitetimen jáne Jezqazǵan qalasyndaǵy tarihi-arheologiialyq mýzeimen yntymaqtastyq ornatylǵan.
Oqýshylardyń shyǵarmashylyq áleýetin damytý úshin 4 sport sektsiiasy men 6 úiirme ashylǵan.
Mektepti aralap kórý barysynda Memleket basshysyna Qaraǵandy oblysynda sapaly bilim berýdi qamtamasyz etý jóninde bergen tapsyrmalarynyń oryndalýy týraly baiandaldy.
Óńirdegi 499 mektepte 206 myńǵa jýyq oqýshy bilim alady. Onyń ishinde 21318 bala birinshi synyp oqýshylary. Mektepterdegi oryn tapshylyǵyna qatysty máseleni sheshý úshin 2022-2025 jyldary 16 mektep, onyń ishinde úsheýi memlekettik-jekemenshik seriktestik esebinen, sondai-aq bir jeke mektep salý josparlanǵan.
Qasym-Jomart Toqaevqa aýyl mektepterin jańǵyrtý jumystary týraly málimet berildi. Biyl óńirde 166 mektep jóndeýden ótken jáne 2025 jylǵa deiin 299 mektep jańǵyrtylady dep josparlanǵan.
Oqýshylardyń qaýipsizdigin qamtamasyz etý úshin Qaraǵandy oblysynyń barlyq bilim berý nysandarynda dabyl túimesheleri men habar berý júieleri ornatylǵan. 300-den astam bala oqityn mektepterde arnaiy kúzet qyzmeti jumys isteidi jáne týrniketter qoiylǵan.
