Prezidenttiń baspasóz hatshysy Rýslan Jeldibai Memleket basshysynyń Jeńis kúni meiramyna orai ótkiziletin is-sharalarǵa qatysýyna bailanysty BAQ saýaldaryna jaýap berdi, dep habarlaidy "Ult aqparat" BORT N1 Telegram arnasyna silteme jasap.
«BAQ ókilderi Prezidenttiń Jeńis kúni meiramyna orai ótkiziletin is-sharalarǵa qatysýyna bailanysty saýaldaryn joldap jatyr. Biyl 9 mamyr kúni Memleket basshysy Qasym-Jomart Toqaev elordadaǵy «Otan qorǵaýshylar» monýmentindegi Máńgilik alaýǵa dástúrli gúl qoiý rásimine qatysýdy josparlap otyr.
Sonymen qatar Prezident 6 mamyrda Otan qorǵaýshylar kúni men Jeńis kúnine arnalǵan saltanatty jiynǵa qatysady. Memleket basshysynyń tapsyrmasy boiynsha biyl barlyq óńirde soǵys ardagerlerine kem degende 1 million teńgeden birjolǵy járdemaqy berilip jatyr», - deidi Rýslan Jeldibai.
Budan bólek ol tyl eńbekkerleri men olarǵa teńestirilgen azamattarǵa da materialdyq qoldaý kórsetiletinin aitty.
«8-9 mamyr kúnderi oblys ákimderi deńgeiinde soǵys ardagerlerimen jáne olardyń otbasy múshelerimen arnaiy kezdesýler uiymdastyrylady. Búkil elimiz boiynsha «Ardagerlerge taǵzym» qaiyrymdylyq aktsiiasy ótedi. Soǵys ardagerlerine memleket tarapynan qajetti kómek aldaǵy ýaqytta da júieli túrde beriledi», - dedi baspasóz hatshysy.
