Memleket basshysy «Jańa adamdar» qozǵalysynyń belsendi ókilderimen kezdesti, dep habarlaidy "Ult aqparat" Aqordanyń resmi saityna silteme jasap.
Prezident «Jańa adamdar» jastar qozǵalysyn qurý týraly bastamany quptap, belsendi jas qazaqstandyqtarǵa árdaiym qoldaý kórsetetetin aitty. Qasym-Jomart Toqaev memleketti túbegeili jańǵyrtý jumystary júrgizilip, Ádiletti Qazaqstandy qurý jónindegi reformalar júzege asyrylyp jatqanyn atap ótti.
– Qazaqstan azamattarynyń, ásirese jastardyń eńbekqorlyq qaǵidatyn ustanýy mańyzdy. Syrttan kómek kútýdiń qajeti joq. Qazir zaman basqa, iaǵni mańyzdy sheshimderdiń ýaqyty, serpilis jasaityn sát. Jastar bolmasa, munymen kim ainalysady? Qazir Ilon Masktyń tájiribesi men ómirlik ustanymyn úlgi etý úrdiske ainaldy. Iá, ol otbasymen birge Ońtústik Afrikadan Amerika Qurama Shtattaryna keldi. Óziniń kreativtiliginiń, batyldyǵynyń, ózine tán ereksheliginiń arqasynda «Ilon Mask fenomenin» qalyptastyra aldy. Mundai mysaldar óte kóp. Jaqynda Men Niý-Iorkte Amerikanyń joǵary oqý oryndaryn bitirip, amerikalyq kompaniialarǵa jumysqa ornalasqan jastarymyzben kezdestim. Men olarǵa: «Biz sizderdi Qazaqstan azamattary dep bilemiz. Sizder – qazaqsyzdar. Niý-Iork nemese Eýropa elderi bolsyn, álemniń damýshy elderi bolsyn, qai jerde jumys isteseńiz de, qazaq bolyp qalasyzdar» dep aittym, – dedi Memleket basshysy.
Prezident jastar ókilderin tolerantty, damyǵan qoǵamdy birge qurýǵa shaqyrdy. Memleket basshysynyń pikirinshe, jastar ózin-ózi udaiy jetildirip, jan-jaqty damytyp, til úirenýi qajet.
Memleket basshysy jaýapkershilik máselesin de qozǵady. Prezidenttiń aitýynsha, tek jaýapkershiligi bar azamattar ǵana óziniń memleketi úshin mindetteme ala alady.
– Abai kezinde «tolyq adam» degen tereń uǵymdy engizdi. Abai zamanynan oza týdy. Ol «tolyq adam» týraly bilim, túsinik, qoǵamnyń qajettiligi turǵysynan aitty. Qazir aǵylshynsha aitylyp júrgen «a person of integrity», iaǵni barlyq qarym-qabileti men bilimi toǵysqan adam degenimiz osy. Sondyqtan biz bárimiz «tolyq adam», jaýapty azamat bolýǵa tyrysýymyz kerek. Shyn máninde, biz qoǵamymyzda tártip pen zań ústemdigi kýltin ornatýǵa umtylýymyz kerek. Meniń mindetim – elimizdiń zańdary ádil bolǵanyn, adamdardyń ol zańdarǵa senýin qamtamasyz etý. Osy zań aiasynda qoǵamymyzda tártip bolýyn talap etemiz, – dep málimdedi Prezident.
Qasym-Jomart Toqaevtyń pikirinshe, jastar elimizdiń qoǵamdyq ómirine belsendi túrde aralasyp, óz ustanymyna berik bolyp, túrli ideialar usynyp, olardy iske asyrýǵa atsalysqany jón.
– Belsendi azamattyq áreket arqyly sizder, birinshiden, memleketke paida ákelesizder, ekinshiden, ózderińizdi tanyta alasyzdar. Qalai bolǵanda da, biz mamandar irikteletin, sáikesinshe ýaqyt óte kele memleketti basqarý jaýapkershiligin arqalai alatyn óte qabiletti adamdar shyǵatyn ashyq qoǵamǵa qarai qadam basyp kelemiz. Sizderdiń aralaryńyzda keleshekte depýtat nemese ministr bolatyn, tipti memleketimizdiń prezidenti bolatyn azamattar otyr dep oilaimyn, – dedi Memleket basshysy.
Prezident sóz sońynda «Jańa Adamdar» jastar uiymyna tabys tiledi.
– Bizdiń kórnekti aqynymyz Maǵjan Jumabaevtyń «Men jastarǵa senemin» degen sózi bar. Shyn máninde, men de jastarǵa senemin. Barshańyzdy qoldaimyn. Rasynda, bizdiń elimizge sizder siiaqty belsendi, bilimdi, kózi ashyq, kókiregi oiaý jastar kerek. Elimizdiń bolashaǵy jastardyń qolynda, – dedi Qasym-Jomart Toqaev.
Sonymen qatar sharada qozǵalys jetekshileri men belsendileri Ásel Bádenova, Eldana Kádenova, Rizabek Rashit, Kúnnur Bolatbek jáne Dilnaz Qapezova sóz sóiledi.
