Búgin Túrkistan oblysyna kelgen QR Ishki ister ministri Erlan Turǵymbaev Prezident Jarlyǵymen marapattalǵan Tótenshe jaǵdailar jáne Politsiia departamentteriniń qyzmetkerlerine medaldardy tabys etti, dep habarlaidy "Ult aqparat".
Saltanatty shara óńirlik Politsiia departamentiniń ǵimaratynda ótti.
Atap aitqanda, «Erligi úshin» medalimen Túrkistan oblystyq TJD qyzmetkerleri - Baqdáýlet Álimqulov, Quralbek Jumabaev, Rústem Saidahmetov, Baǵlan Úbaidillaev pen Politsiia departamentiniń maiory Qanat Raqyshev marapattaldy. Sondai-aq politsiia podpolkovnigi Ermek Óserbaev pen politsiia leitenanty Qairat Álekeshevke Ishki ister ministriniń buiryǵymen «Órtte kórsetken qaisarlyǵy úshin» medaldary tabystaldy.
Órt kezinde jedel qimyldap ózderiniń qyzmettik mindetterin minsiz oryndaǵan qyzmetkerlerdi quttyqtaǵan ministr E.Turǵymbaev: «Bizdiń ishki ister organy qatarynda óziniń erligin kórsetip, antyna adal bolyp kele jatqan sizder sekildi qyzmetkerler barda halyqtyń uiqysy tynysh jáne qaýipsiz bolatyndyǵyna senimim mol», - dep atap ótti.
Odan ári QR IIM basshysy Túrkistan oblystyq TJD qyzmetkeri azamattyq qorǵaý podpolkovnigi Baqytjan Ábdýǵapparovtyń úiine baryp, oǵan II dárejeli «Aibyn» ordenin tabys etti. Ol órtti aýyzdyqtaý kezinde aýyr jaraqat alyp, úiinde emdelýde. Ministr podpolkovnik B.Ábdýǵapparovqa jáne onyń otbasyna órt sóndirý jáne adamdardy qutqarý kezinde kórsetken batyldyǵy, batyrlyǵy men janqiiarlyǵy úshin alǵys aitty. Sondai-aq tez arada saýyǵyp ketýine tilektestik bildirdi.
Baqytjan Ábdýǵapparov Arys qalasynda azamattardy qutqarý kezinde de óziniń qaisarlyǵymen erekshe kózge túsken bolatyn.
Eske sala keteiik, aǵymdaǵy jyldyń 10 qyrkúieginde Túrkistan qalasyndaǵy iri qonaqúilerdiń biri «Roial Grand» otqa oranǵan bolatyn. Oqiǵa ornyna kelgen oblystyq TJD qyzmetkerleri men politseiler jaqyn mańdaǵy aýmaqty qorshaýǵa alyp, qonaqúidiń qonaqtary men qyzmetkerlerin dereý evakýatsiialaýǵa kirisken bolatyn. Qutqarý jumystaryn júrgizý barysynda 50 adam qaýipsiz jerge shyǵaryldy.
«Sol sátte, tártip saqshysy Qanat Rakishev óz ómirin qaýipke tigip, otqa oranǵan ǵimarattan shyǵa almai qalǵan Túrkiia eliniń eki professory men 4 jasar búldirshindi din aman alyp shyqqan edi. Osyndai erligimen kózge túsken batyrymyz búginde Túrkistan oblysy Politsiia departamentine qarasty Patrýldik politsiia batalonynyń qyzmetkeri, Otanyna degen adaldyǵymen qaltqysyz qyzmet etýde», - dedi oblystyq Politsiia departamentinen.
Budan bólek, ministr Politsiia departamentiniń ǵimaratyn aralap, politseilerdiń qym-qýyt jumysymen de tanysty. Departament janynan ashylǵan halyqtyq-keńsede bolyp, politseilerdiń jańa formattaǵy qyzmetin kórip qaitty.
