Prezident volonter qyzmetin qoldaýdyń biryńǵai standartyn jasaýdy tapsyrdy

Memleket basshysy Qasym-Jomart Toqaev volonterlik qyzmetti qoldaýdyń biryńǵai standartyn jasaýdy tapsyrdy, dep habarlaidy "Ult aqparat".

«Eriktiler uiymdaryna júieli qoldaý kórsetip, olarǵa arnaiy granttar bólý jumysyn jalǵastyrý qajet. Biyl atqarylǵan igilikti ister osy jylmen ǵana shektelip qalmaýǵa tiis. Jaqsy is árdaiym jalǵasyn tabýy kerek. Osy oraida eriktilikti damytýdyń jol kartasyn ázirleý mańyzdy. Sondai-aq, eriktilerdi daiarlaýǵa arnalǵan baǵdarlama qajet. Eriktiler qyzmetin uiymdastyrýdyń basty talaptary men ustanymdaryn aiqyndap alǵan jón. Osy maqsatpen Volonterlik qyzmetti qoldaýdyń biryńǵai standartyn jasaýdy tapsyramyn», - dedi Memleket basshysy Volonter jylynyń jabylý rásiminde sóilegen sózinde. 

QR Prezidenti volonterlik – jai ǵana áleýmettik qubylys emes ekendigin basa aitty. 

«Tipti, bir kúnde qalyptasatyn ádet nemese daǵdy deýge de bolmaidy. Bul – kóptegen adamdardyń sanaly túrde tańdaǵan ómir salty. Qaiyrymdylyq – adamnyń bala kezinen boiǵa sińetin qasiet. Sondyqtan, óskeleń urpaqty jastaiynan jaqsylyq jasaýǵa tárbieleý – óte mańyzdy mindet», - dedi Qasym-Jomart Toqaev.

Osy rette Memleket basshysy barlyq bilim mekemelerinde taqyryptyq sabaqtar men fakýltativtik saǵattar engizýdi usyndy.

«Qoǵamǵa qyzmet etýdi zerdesine túigen ul-qyzdarymyz naǵyz azamat bolary anyq. Dana Abai aitqan «Ystyq qairat, nurly aqyl, jyly júrek» dál qazirgi kezeńde aýadai qajet. Bul asyl qasietter volonter qataryna qosylamyn degen árbir jastyń boiynan tabylady dep senemin», - dedi QR Prezidenti.