Immýndaý protsesin jalǵan pasporttar tejep otyr. Prezident Qasym-Jomart Toqaev eldegi sanitarlyq-epidemiologiialyq ahýal jónindegi jumys keńesinde osylai málim etti, dep habarlaidy "Ult aqparat".
«Immýndaý protsesin tejeitin taǵy bir ózekti másele – jalǵan vaktsinatsiia pasporty. Bul jaǵymsyz qubylystyń taralýymen bailanysty kez kelgen áreketti tez arada toqtatý mańyzdy. Jumys bastaldy, ony jalǵastyrý kerek», - degen Prezident Ishki ister ministrligi janynan qoǵam ókilderi men halyqtan aqparat alyp, óńdeitin vedomstvoaralyq arnaiy top qurýdy tapsyrdy.
«Vaktsinatsiia tólqujattaryn qoldan jasaýǵa jol bergen adamdarǵa qatań jaza qoldanýdy tapsyramyn. Men bul máseleni keńeitilgen otyrysta kóterdim. Áńgime eldiń ulttyq qaýipsizdigi týraly bolyp otyr», - dedi Qasym-Jomart Toqaev.
