Prezident Qasym-Jomart Toqaev Úkimetke tótenshe jaǵdai týraly habarlaý júiesin jetildirýdi tapsyrdy, dep habarlaidy QazAqparat.
«Órt týraly habardyń kesh jetkeni týraly aitsaq, bul áýeli tehnikalyq problema bolsa kerek. Ol týraly jańa da sóilestik. Úkimetke bul problemany sheshý júkteledi. Tutanǵan órt týraly jáne onyń aýmaǵy týraly naqty aqparatty keshikpei alý úshin tiisti tehnikalyq qondyrǵy ornatylýy kerek», - dedi Memleket basshysy Qostanai oblysynda bolǵan órtti sóndirý jónindegi shuǵyl áreket etý shtabynyń otyrysynda.
Prezident órt sóndirýshi mamandardy daiarlaý isine iri biznestiń de qoldaý kórsetýi kerektigin atap ótti.
«Ministr (Tótenshe jaǵdai ministri Iýrii Ilin – avt.)tikushaqta maǵan Kókshetaýda maman daiarlaityn oqý orny bar ekenin baiandady. Biraq ol mekemeniń tehnikalyq jabdyqtalýy nashar. Eń áýeli jataqhana joq. Jataqhana bolmasa, stýdentterdi qalai oqytýǵa bolady? Bul máseleni óte shuǵyl sheshý kerek. Bizdiń tabysty kásipkerler, basqa da materialdyq múmkindigi jaqsy adamdar birinshi kezekte jataqhana salý máselesin sheshýge kómektesedi dep oilaimyn. Oqý korpýsyn sodan keiin salyp, jaraqtandyramyz», - dedi Qasym-Jomart Toqaev.
