Foto: Aqorda
Memleket basshysy Qasym-Jomart Toqaev Týrizm jáne sport ministri Erbol Myrzabosynovty qabyldap, saladaǵy reformalardyń júzege asyrylý barysymen tanysty, dep habarlaidy Ult.kz.
Ministrdiń baiandaýynsha, qazirgi kezde balalar men jasóspirimder sportyn qoldaý, halyqaralyq yntymaqtastyqty arttyrý, sportqa ǵylymi tásilderdi engizý, biýdjet qarajatyn tiimdi paidalaný jáne zańnamany jetildirý baǵytynda jumystar júrgizilip jatyr.
Erbol Myrzabosynov sport salasynda vertikaldi basqarý júiesin qalyptastyrý qarqyndy júrip jatqanyn jetkizdi. Bul aiasynda birqatar oblysta sport basqarmalarynyń jańa basshylary taǵaiyndalyp, naqty tiimdilik kórsetkishteri belgilendi. Sondai-aq sportshylar men jattyqtyrýshylarǵa beriletin tólemder biryńǵai standartqa keltirilip, sporttyń basym túrlerine qoiylatyn irikteý talaptary naqtylandy.
Biyl kúshine engen «Dene shynyqtyrý jáne sport týraly» zańnyń jańa redaktsiiasy belsendi júzege asyrylýda. Qujat biýdjet qarjysyn únemdi paidalanýǵa, basym sport túrlerin damytýǵa jáne kásipqoi klýbtarǵa bólinetin tólemderge limit engizýge baǵyttalǵan.
Kezdesýde ministr týrizm salasyndaǵy jumystar týraly da baiandady. Prezidenttiń tapsyrmasymen Shýche-Býrabai kýrorttyq aimaǵy men Mańǵystaýdy damytýdyń keshendi jospary daiyndaldy, Almaty taý klasterin órkendetý jospary ázirlenip jatyr. Sondai-aq kýrortty óńirlerdi damytýǵa arnalǵan vedomstvoaralyq jol kartasy jasalǵan. Onda týristerdiń qaýipsizdigi, sanitarlyq standarttardy kóterý jáne kólik qoljetimdiligin arttyrý máselelerine erekshe kóńil bólingen.
Qasym-Jomart Toqaev ministrge birqatar naqty tapsyrma júktedi. Atap aitqanda, sport salasynda vertikaldi basqarý júiesin engizýdi jalǵastyrý, fýtbol klýbtaryn jekeshelendirýdi jedeldetý jáne týrizm zańnamasyn odan ári jetildirý qajettigin atap ótti.
