Elordadaǵy Táýelsizdik saraiynda Qazaqstan Prezidenti Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń alǵashqy otyrysy bastaldy, dep habarlaidy QazAqparat.
Ulttyq qoǵamdyq senim keńesi Qazaqstan Respýblikasynyń Prezidenti janyndaǵy konsýltativtik-keńesshi organ sanalady. Ulttyq keńes qyzmetiniń negizgi maqsaty - jurtshylyqtyń, saiasi partiialardyń, azamattyq qoǵamnyń ókilderimen keńinen talqylaý negizinde memlekettik saiasattyń ózekti máseleleri boiynsha usynystar men usynymdar. Ol óz qyzmetinde Qazaqstan Respýblikasynyń Konstitýtsiiasyn, zańdaryn, Qazaqstan Respýblikasy Prezidentiniń aktilerin, ózge de normativtik quqyqtyq aktilerdi, sondai-aq osy erejeni basshylyqqa alady.
Ulttyq keńestiń negizgi mindetteri: tujyrymdamalardyń, memlekettik baǵdarlamalardyń jáne normativtik quqyqtyq aktilerdiń jobalaryna qoǵamdyq saraptama júrgizý; jurtshylyqtyń jáne azamattyq qoǵamnyń pikirin eskere otyryp mańyzdy strategiialyq problemalardy qaraý; jurtshylyqtyń, saiasi partiialardyń, úkimettik emes sektordyń jáne memlekettik organdardyń ókilderi arasynda syndarly dialogty qamtamasyz etý; óziniń quzyreti sheginde Qazaqstan Respýblikasynyń zańnamasyna qaishy kelmeitin ózge de qyzmetti júzege asyrý bolyp tabylady.
Ulttyq keńestiń quramy belgili memleket jáne qoǵam qairatkerleriniń, saiasi partiialar, úkimettik emes sektor ókilderiniń qatarynan qalyptastyrylady. Qazaqstan Respýblikasy Prezidenti Ákimshiliginiń Basshysy, Qazaqstan Respýblikasyndaǵy Adam quqyqtary jónindegi ýákil, Qazaqstan Respýblikasyndaǵy Bala quqyqtary jónindegi ýákil, Qazaqstan kásipkerleriniń quqyqtaryn qorǵaý jónindegi ýákil óz laýazymdaryna sáikes Ulttyq keńestiń quramyna kiredi. Tóraǵanyń sheshimi boiynsha Ulttyq keńeske respýblikalyq jáne jergilikti deńgeidegi qoǵamdyq keńesterdiń ókilderi, sondai-aq ózge de adamdar engizilýi múmkin.
Aita keterligi, osy jyldyń shilde men tamyz ailarynda Almaty jáne Nur-Sultan qalalarynda Ulttyq keńeske múshelikke engen azamattarmen kezdesý ótkizilgen bolatyn. Sol kezdesýdegi talqylaý barysynda Ulttyq qoǵamdyq senim keńesiniń alǵashqy otyrysynyń aldynda uiymdastyrýshylyq jiyndy ótkizý ýaǵdalastyǵyna qol jetkizildi. Uiymdastyrýshylyq jiyn 28 tamyzda QR Prezidenti Ákimshiliginiń basshysy, Keńes tóraǵasynyń orynbasary Qyrymbek Kósherbaevtyń basshylyǵymen ótti. Kezdesý jumysyna Ulttyq keńestiń músheleri qatysty. Onyń aiasynda Ulttyq keńes qyzmetiniń baǵyttary men tetikteri, Ulttyq keńestiń birinshi otyrysyn ótkizýge daiyndyq máseleleri talqylanyp, jumys toptary quryldy. Qazaqstan Respýblikasy Prezidentiniń 2019 jylǵy 17 shildedegi №63 Jarlyǵymen bekitilgen Qazaqstan Respýblikasy Prezidentiniń janyndaǵy Ulttyq qoǵamdyq senim keńesi týraly erejege sáikes, Ulttyq keńes múshelerine kýálikter tapsyryldy.
Sol kúni QR Prezidenti Qasym-Jomart Toqaev Ulttyq qoǵamdyq senim keńesiniń múshelerimen birqatar kezdesýler ótkizdi.
