Foto: Akorda.kz
Memleket basshysy Ǵylym jáne joǵary bilim ministri Saiasat Nurbekti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke Qonaev qalasynda akademiialyq qalashyq salý jumystary bastalǵany týraly esep berildi.
Sonymen qatar Qasym-Jomart Toqaevqa byltyr halyqaralyq ýniversitetterdiń úsh ókildigi ashylǵany jáne biyl bes jańa filial ashylatyny jóninde málimet berildi.
Budan bólek, ministr 2023-2029 jyldarǵa arnalǵan Joǵary bilim men ǵylymdy damytý tujyrymdamasynyń jobasyn usyndy. Qujatta atalǵan salany damytýdyń barlyq strategiialyq mindeti men kórsetkishi qamtylǵan.
Memleket basshysyna ǵylymi qyzmetkerlerdiń jalaqysy 2 ese óskeni jáne irgeli zertteý jumystarymen ainalysatyn ǴZI-dy tikelei qarjylandyrý máselesi jóninde baiandaldy. Aldaǵy 3 jylda ǵylymi jumystardy qarjylandyrý 3,5 esege artady.
Ministrlik stýdentter men magistranttardyń stipendiiasyn kezeń-kezeńmen ósirýdi jáne stýdentter jataqhanalarynda 7 jyl boiy jyl saiyn jańadan 10 000 oryn ashýdy josparlap otyr.
Saiasat Nurbektiń aitýynsha, 15 óńirlik jáne 5 pedagogikalyq JOO bazasynda ǵylymdy ákimshilendirýdiń jańa modelin engizý jáne akademiialyq basymdyq ortalyqtaryn qurý máselesi pysyqtalyp jatyr.
Kezdesý sońynda Qasym-Jomart Toqaev joǵary bilim alýǵa qoljetimdilikti arttyrýdyń jáne ýniversitet infraqurylymyn damytýdyń mańyzdylyǵyn atap ótti. Sondai-aq jýyq arada ǵylymdy ákimshilendirýdiń jańa modeline kóshý qajettigin aitty.
