Memleket basshysy Qasym-Jomart Toqaev «Qazaqstan» telearnasyna bergen suhbatynda latyn álipbiine kóshýdiń qaǵidattaryna toqtaldy, dep habarlaidy QazAqparat.
«Bizdiń halqymyz talai «tar jol, taiǵaq keshýdi», qily zamandy basynan ótkergen. Qiyndyqtyń bárin jeńgen. Keshegi qasiretti oqiǵa kezinde halqymyz birligin kórsetti. Osy qundylyqty keleshek urpaqqa amanat etýimiz kerek.
Qazaqstannyń bolashaǵy jarqyn bolatyny sózsiz. Men buǵan kámil senemin. Bizdiń bir ǵana Otanymyz bar. Basqa Otanymyz joq. Bolmaidy da. Elimizdiń Táýelsizdigi bárinen qymbat. Bul – aksioma, aqiqat. Ony kózdiń qarashyǵyndai saqtaý – ortaq paryzymyz», - dedi Prezident.
Sondai-aq, ol egemendiktiń bir belgisi álemdik úrdiske beiimdele bilgen birtutas halyqqa ainalý ekenin jetkizdi.
«Al, Egemen el degenimiz qandai el? Bul – álemdik úderiske beiimdelgen birtutas halyq. Derbestigin jalań sózben, nemese uranmen emes, naqty ispen dáleldei bilgen el. Demek, «Egemendikti saqtap qalamyz ba?» degen kúmándi oi eshkimde bolmaýy kerek. Ol qisynsyz tujyrym, qisynsyz sóz. Kerisinshe, árqaisymyz «Táýelsizdigimizdi qalai bekem ustap qalamyz?» dep oilanýǵa tiispiz», - dedi dedi Qasym-Jomart Toqaev.
Onyń aitýynsha, egemendik nyǵaitý jolynda til reformasyn jasaý kerek.
«Tilimizge kelsek, ony da saqtap qalamyz. Basqasha bolmaidy, sebebi, tarihymyzdaǵy eń kúrdeli kezeńderde tilimiz kózi ashyq aǵalarymyzdyń, qarapaiym halqymyzdyń arqasynda aman qaldy. Degenmen til reformasyn jasaýymyz kerek. Másele latyn grafikasyna jedel túrde kóshý emes. Bul máselege baiyppen qaraǵan jón. Saraptama jasalýǵa tiis. Qisynsyz nárseniń paidasy joq. Ásirese tilge kelgende, asyǵystyq tanytýǵa bolmaidy. Sebebi bul óte názik dúnie», - dedi Prezident.
