Foto: Aqparat jáne Mádeniet ministrligi
Memleket basshysy Qasym-Jomart Toqaev barlyq deńgeidegi máslihattar depýtattarynyń II respýblikalyq forýmynda qoǵamda tazalyq mádenieti ornyǵýy qajet ekenin aitty. Osyǵan orai, biyl elimizde «Taza Qazaqstan» jobasy qolǵa alynǵanyn jáne bul – óte mańyzdy bastama ekenin atap ótti, dep habarlaidy Ult.kz.
"Aimaqtarda aýqymdy ekologiialyq sharalar atqarylyp jatyr. Jumystyń nátijesi qazirdiń ózinde aiqyn kórine bastady. Shetelden kelgen qonaqtar eldi mekenderimizdiń erekshe tazalyǵyna nazar aýdarýda. Tipti, muny basqa jurtqa úlgi etip, áleýmettik jelige jariialap júrgen týrister bar. Árine, sheteldikterdiń maqtaǵany jaqsy. Biraq tazalyq ózgelerden buryn ózimizge kerek", - dedi Prezident.
Aitýynsha, bul – Jarlyqpen jasalatyn, Ókimmen oryndalatyn sharýa bolmaýy tiis. Tazalyq aldymen halqymyzdyń ádetine, sosyn qanǵa sińgen qasietine ainalýy qajet, deidi ol.
"Shyn máninde, órkenietti eldiń basty sipatynyń biri – tazalyq pen tártip. Sondyqtan «Taza Qazaqstan» sharasy jyl on eki ai boiy jalǵasýǵa tiis. Sizder ár qiyrdaǵy aýyl-aýdandardan kelip otyrsyzdar. Osy sátti paidalanyp, barshańyzdy «Taza Qazaqstandy» tutas el bolyp qoldaýǵa shaqyramyn. Bul is-sharadan bir de bir eldi meken shet qalmaýy kerek. Árbir aýyl, árbir qala tazalyqtyń úlgisi bolýy qajet", - dedi Qasym-Jomart Toqaev.
Buǵan deiin biz Qasym-Jomart Toqaevtyń barlyq deńgeidegi máslihattar depýtattarynyń II respýblikalyq forýmyndaǵy mańyzdy málimdemelerine toqtalǵan bolatynbyz.
