QR Prezidenti Qasym-Jomart Toqaev «Altyn sapa» syilyǵy jeńimpazdaryn quttyqtady, dep habarlaidy QazAqparat.
«Biz sapalay ónim óndirip, tabysty jumys istep jatqan biznes ókilderin jyl saiyn marapattaimyz. Sondai-aq, áleýmettik bastamalardy júzege asyrýǵa barynsha atsalysyp júrgen isker azamattarǵa qurmet kórsetemiz. Sol arqyly jasalǵan eńbek pen shynaiy tabystylyqty dáripteimiz. «Altyn sapa» baiqaýy 15 jyldan beri turaqty ótkizilip keledi. Búginge deiin 150-den astam kompaniia Prezident syilyǵynyń iegeri atandy», - degen Memleket basshysy biylǵy saltanatty jiyn Táýelsizdiktiń 30 jyldyq mereitoiymen tuspa-tus kelgenin eske saldy.
«Munyń zor simvoldyq máni bar. Egemendik kezeńinde Qazaqstanda biznestiń damýyna jan-jaqty jaǵdai jasaldy. Sonyń nátijesinde jańa zamanǵa sai kásipkerler shoǵyry qalyptasty. Olar ulttyq ekonomikanyń basty qozǵaýshy kúshine ainaldy. Búginde otandyq biznes elimizdegi indýstriialandyrý úderisine zor úles qosýda. Sońǵy 10 jylda óńdeý ónerkásibiniń ekonomikadaǵy úlesi taý-ken salasynyń kórsetkishinen asyp, 33 paiyzǵa jetti. Búkil elimiz boiynsha 1500 jańa óndiris iske qosyldy. Bul maqsatqa 9 trln teńgeden astam investitsiia jumsaldy. 820 myńnan astam turaqty jumys orny ashyldy. Byltyr óńdeý ónerkásibiniń eksporty úsh ese ósip, 15,4 mlrd dollarǵa jetti. Qazaqstanda óńdelgen ónimder búginde 131 memleketke eksporttalady», - dedi Prezident.
