QR Memlekettik hatshysy Erlan Qarin Prezident Jarlyǵymen úsh maidanger otandasymyzdyń nagradtalýyna orai pikir bildirdi, dep habarlaidy "Ult aqparat".
"Búgin adamzat tarihyndaǵy eń alapat soǵysta óshpes erlik jasaǵan otandastarymyzǵa Memleket basshysynyń Jarlyǵymen «Halyq qaharmany» ataǵy berildi. Olar – Tóleýǵali Ábdibekov, Aleksandr Nesmiianov jáne Ybyraiym Súleimenov.
Kezinde batyr ataǵyna usynylǵanymen, túrli sebepterge bailanysty erlikteri eleýsiz qalǵan jaýyngerlerdiń qai-qaisysy da eń joǵary marapatqa ábden laiyq azamattar edi.
302-shi gvardiialyq atqyshtar polkiniń aǵa serjanty Tóleýǵali Ábdibekov sol kezdegi eń úzdik 20 snaiperdiń biri bolǵan. Bir ózi 397 dushpandy nysanaǵa iliktirgen mergenniń myltyǵy búginde Qazaqstannyń Ortalyq memlekettik mýzeiinde saqtaýly tur.
Al, 690-shy atqyshtar polkiniń komandiri Aleksandr Nesmiianov soǵys kezinde úsh ret batyr ataǵyna usynylǵan. Sheshýshi sátterde erekshe qaisarlyqtyń úlgisin kórsetken ol asa kúrdeli tapsyrmalardy oryndap, jaýdyń betin qaitarýǵa zor úles qosqan.
100-shi jeke atqyshtar brigadasynyń starshinasy Ybyraiym Súleimenov te quralaidy kózge atqan mergen boldy. Ol úsh júzge jýyq jaýdyń kózin joidy. Nevel qalasynyń túbindegi keskilesken shaiqasta Mánshúk Mámetova ekeýi erlikpen qaza tapty. Alaida snaiperdiń erligi laiyqty baǵalanbady.
Úsh maidangerdiń qai-qaisysy da halyq jadynda naǵyz batyrlar retinde saqtalǵan. Búgin Memleket basshysy tarihi ádildikti qalpyna keltirdi" - dep jazdy ol Facebook paraqshasynda.
