Úkimet Esep komitetimen birlesip 15 qazanǵa deiin daǵdaryspen kúresý úshin bólingen qarajatty jumsaýdyń tiimdiligine taldaý jasaýy qajet. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy "Ult aqparat" Aqorda baspasóz qyzmetiniń Twitter-degi paraqshasyna silteme jasap.
«Josparlaýdyń shalalyǵy, satyp alý qunynyń tym qymbattyǵy, jekelegen is-sharalardyń tiimdiligi men qajettigi áli de túitkildi máseleler bar ekenin kórsetip otyr. Sondyqtan qatań baqylaý sharalaryn engizýimiz kerek. Áitpese bos sózden nátije shyqpaidy», - dedi Qazaqstan Prezidenti.
Qasym-Jomart Toqaev Úkimet Esep komitetimen birlesip 15 qazanǵa deiin daǵdaryspen kúresý úshin bólingen qarajatty jumsaýdyń tiimdiligine taldaý jasaýy qajet ekendigin eskertti.
«Taldaý óńirler men ortalyq memlekettik organdar ereksheligin eskere otyryp jasalýy kerek. Onda árbir ministr men ákim boiynsha qorytyndy tujyrymdar bolýǵa tiis»,- dep eskertti Memleket basshysy.
