Aýyl sharýashylyǵy vitse-ministri Aidarbek Saparov Memleket basshysynyń sýarmaly jerler kólemin kezeńmen 3 mln gektarǵa deiin ulǵaitý jónindegi tapsyrmasy qalai oryndalyp jatqanyn aityp berdi, dep habarlaidy QazAqparat.
«Qazirgi ýaqytta sý sharýashylyǵy infraqurylymy júrgizilgen sýarmaly jerlerdiń kólemi 1,5 mln gektardy quraidy. Memlekettik baǵdarlama aiasynda 2017-2019 jyldar kezeńinde 146 myń ga sýarmaly jer qalpyna keltirildi. Bul rette 2017-2018 jyldary qalpyna keltirilgen 80 myń ga sýarmaly jerdiń 37,7 myń gektary ǵana (Aqtóbe – 1,4 myń ga, Almaty – 11,3 myń ga, Jambyl – 20,4 myń ga, Qaraǵandy – 0,63 myń ga, Soltústik Qazaqstan-1,6 myń ga, Shyǵys Qazaqstan – 2,32 myń ga) maqsatty túrde paidalanylady», - dedi vitse-ministr vedomstvonyń alqa májilisinde.
Aidarbek Saparov qalpyna keltirilgen jerdiń maqsatty túrde paidalanylmaýynyń sebepterin atady. Onyń aitýynsha sýarý júieleriniń, jańbyrlatqysh tehnikanyń bolmaýy, qarjylyq jáne basqa da problemalar barshylyq.
«Osyǵan orai oblys ákimdikteri qalpyna keltirilgen sý sharýashylyǵy infraqurylymdarynda jerdi maqsatty paidalaný boiynsha sharalar qoldanýy qajet. Biyl 2019 jyly oryndalmaǵan kólemdi eskere otyryp 182 myń ga sýarmaly jer alqabyn qalpyna keltirý josparlanýda», - dedi ol.
Aidarbek Saparov, sonymen qatar, Memleket basshysy 2030 jylǵa deiin sýarmaly jer kólemin kezeńmen 3 mln gektarǵa deiin ulǵaitý jóninde tapsyrmasy qalai oryndalyp jatqanyn aityp ótti.
«Qazirgi tańda oblys ákimdikteri 1 mln ga shamasyndaǵy jerdi aldyn-ala aiqyndady. Memlekettik-jekeshelik áriptestik mehanizmi arqyly jekeshelik áriptestiktiń qatysýymen irrigatsiialyq júielerdi salý jáne jańa sýarmaly jerlerdi damytý jobalaryn iske asyrý úshin áleýetti investorlardy, sýarý tásilderin jáne ósiriletin daqyldar qurylymyn aiqyndaý jumystaryn júrgizýde. Bul rette ministrlik, sonymen qatar, engizilgen sýarmaly jerlerdi tiimdi paidalaný jumystaryn júrgizýde», - dedi ol.
