Shyǵys Qazaqstan oblysyndaǵy ózenderdiń lastanýyna bailanysty «Vizol» JShS jaýapkershilikke tartyldy, dep habarlaidy QazAqparat Ekologiia, geologiia jáne tabiǵi resýrstar ministrligine silteme jasap.
Memleket basshysy Q.Toqaevtyń tapsyrmasyn oryndaý aiasynda Shyǵys Qazaqstan oblysy boiynsha Ekologiia departamenti ýákiletti organmen jáne ǵylymi uiymdarmen birlesip, 28-30 qyrkúiek aralyǵynda Kúrshim aýdanyndaǵy Kúrshim jáne Qystaý-Kúrshim ózenderiniń lastaný faktisi boiynsha «Vizol» Geologiialyq barlaý kompaniiasy» JShS-na qatysty jospardan tys ekologiialyq tekserý júrgizdi.
«Tekserý barysynda kásiporyndy jaýapkershilikke tartýǵa negiz bolatyndai Qazaqstan qoldanystaǵy Ekologiialyq kodeksiniń normalaryna sáikes kelmeitin birqatar olqylyq anyqtaldy. Osylaisha, tehnologiialyq sý jinaqtaǵyshtardyń toǵanynan sýdyń jer bederine asyp ketýi jáne Qystaý-Kúrshim ózenine quiatyn tundyrǵyshtan sý aǵyzý faktileri anyqtaldy. Nátijesinde, «Ákimshilik quqyq buzýshylyq týraly» kodekstiń (ary qarai – ÁQBtK) 328-babynyń 1-bóligi boiynsha Ákimshilik quqyq buzýshylyq týraly hattama toltyryldy. Aiyppul mólsheri óz erkimen sý aǵyzýdyń kólemi naqtylanǵannan keiin aiqyndalady», delingen habarlamada.
Vedomstvonyń málimdeýinshe, budan basqa, taý-ken jumystarynyń josparyna sáikes ken ornyn igergennen keiin tabiǵi obektilerdi tehnikalyq jáne biologiialyq rekýltivatsiia kómegimen negizgi kúiine keltirý kerek.
«Iaǵni, tabiǵi landshaftty, aǵash ósimdikterin jáne janýarlar áleminiń tirshilik ortasyn qalpyna keltirý qajet. «Vizol» GBK» JShS sharýashylyq qyzmet nátijesinde balyq resýrstaryna keletin zalalǵa qatysty ýaqytyly zertteýler júrgizbegeni, biologiialyq negizdeme ázirlemegeni belgili boldy. Sonymen qatar, taý-ken jumystary turǵysynan qaldyqtardy basqarý júiesi saqtalmaǵan. Osy buzýshylyqtar úshin kásiporynǵa qatysty ÁQBtK-niń 332-babynyń 2-bóligi jáne 344-babynyń 3-bóligi boiynsha Ákimshilik quqyq buzýshylyq týraly hattama jasaldy. Bul baptar boiynsha salynǵan aiyppul kólemi 200 myń teńgeden asady», delingen habarlamada.
Sonymen qatar, anyqtalǵan buzýshylyqtardy joiý maqsatynda joǵaryda atalǵan taý-ken kompaniiasyna qorshaǵan ortaǵa teris áserdiń aldyn alý jáne azaitý jónindegi tiimdi is-sharalardy iske asyrý, tabiǵi orta komponentterine zertteý júrgizý, biologiialyq negizdeme ázirleý jáne balyq qoryna keltirilgen ziian úshin ótemaqy júrgizý qajettigi týraly nusqama berildi.
Vedomstvonyń málimdeýinshe, oryndalǵan jumystardyń nátijesi qosymsha habarlanady.
Esterińizge sala keteiik, 2021 jylǵy qyrkúiek aiynyń ortasynda Shyǵys Qazaqstan oblysy Kúrshim aýdanyndaǵy Kúrshim jáne Qystaý ózenderi arnalarynyń qaýipti himiialyq zattarmen lastanǵany jóninde aqparat áleýmettik jelide qoǵamdyq rezonans týdyryp, Prezident shuǵyl sharalar qabyldaý týraly tiisti tapsyrma bergen bolatyn.
«Osyǵan bailanysty Memleket basshysy Qasym-Jomart Toqaev Ekologiia, geologiia jáne tabiǵi resýrstar ministrligi men Shyǵys Qazaqstan oblysynyń ákimdigine atalǵan problemany egjei-tegjeili tekserip, kinálilerdi jaýapkershilikke tartý týraly tapsyrma berdi», - dep jazdy QR Prezidentiniń baspasóz hatshysy Berik Ýáli jelidegi paraqshasynda.
