Qostanai qalasyndaǵy qazaq tilinde bilim beretin jalǵyz bastaýysh mektebi jabylmaidy. Bul týraly búgin oblystyq óńirlik kommýnikatsiialar qyzmetinde qala ákimi Qairat Ahmetov jýrnalistermen kezdesýde aitty, dep habarlaidy "QazAqparat".
«Internette shyndyqqa sáikes kelmeitin málimetter tarap jatyr. Negizi másele jańa qazaq mektebin kóshirýden bastaldy. Bul jerde shý kóterip otyrǵan jurtshylyq durys túsinbegen. Biz mektepti jabý emes, ony basqa mekenjaiǵa kóshirý týraly usynys aittyq, iaǵni bastaýysh mektepti Pobeda-Borodin kósheleri qiylysynda ornalasqan kolledjge kóshirý týraly bastama kóterildi. Ata-analardyń pikiri eskerilip, bastaýysh mektep óz ornynda qalatyn boldy. Sondyqtan, BAQ ókilderine resmi aqparatty ǵana taratýdy suraimyz»,- dedi Qairat Ahmetov.
Brifingke qatysqan bilim berý isiniń úzdigi Ásiia Berkenova internette shý kótergen ata-analarǵa syn aitty.
«400 orynǵa arnalǵan mektepte 600 bala oqyp jatyr. Bul bastaýysh mektepte meniń de nemerelerim oqidy. Bul tusta ata-analardyń qala basshylyǵyna nege qarsylyq bildirgenin túsinbedim. Igilikti isti iterip baryp isteitinimiz ras. Sol sebepti, jańadan ashylǵaly otyrǵan qazaq mektebin qoldaý kerek. Urpaǵymyzdy oilasaq, durys sheshim qabyldaiyq»,- dedi Ásiia Berkenova.
Jiyn qorytyndysynda oblystyq bilim basqarmasynyń basshysy Vasilii Tsymbaliýk óńirde qazaq mektepteriniń jabylmaitynyn naqtylady. Onyń sózinshe, oblystaǵy 504 mekteptiń 120-da memlekettik tilde oqytylady.
Buǵan deiin habarlaǵanymyzdai, búgin Memleket basshysy Qasym-Jomart Toqaev Qostanaidaǵy qazaq tilinde bilim beretin mekteptegi kúrdeli jaǵdaiǵa bailanysty alańdaýshylyq bildirgen edi.
«Jergilikti turǵyndardyń pikirine qaraǵanda, Qostanaidaǵy qazaq tilinde bilim beretin jalǵyz mektepke qatysty kúrdeli jaǵdai qalyptasyp otyr. Bilim ministri jáne oblys ákimi barlyq máseleni jańa oqý jylyna deiin sheshýi tiis», dep jazdy Prezident Twitter paraqshasynda.
