Qaljyr ózenin lastaǵandar jaýapqa tartyldy, dep habarlady Ekologiia, geologiia jáne tabiǵi resýrstar ministrliginiń baspasóz qyzmeti.
Baspasóz qyzmetiniń habarlaýynsha, Memleket basshysy Qasym-Jomart Toqaevtyń tapsyrmasy boiynsha, Shyǵys Qazaqstan oblysy boiynsha Ekologiia departamenti Kúrshim aýdanyndaǵy Qaljyr ózeniniń lastaný faktisine qatysty tekserý júrgizdi.
Biylǵy jyldyń mamyr aiynda Aqbulaq aýyldyq okrýgine qarasty «Shandybulaq» ýchaskesinde júrgizilgen reid sharalary barysynda Kúrshim aýdandyq politsiia bólimi jeke kásipker Sergei Hvannyń ruqsat qujattarynsyz altyndy óz erkimen óndirý faktisin anyqtady.
6 qyrkúiekte Qaljyr ózeniniń lastanýy týraly kelip túsken beinesiýjet negizinde Ekologiia departamenti, tabiǵatty qorǵaý politsiiasy, basseindik inspektsiia jáne basqa da memlekettik organdar qyzmetkerleri atalǵan jerge bardy.
Belgili bolǵandai, jaqyn arada «S.A. Hvan» jeke kásipker ókilderi sot qaýlysyn oryndaý úshin Qaljyr ózeniniń arnasy men onyń jaiylmaly bóligindegi, sondai-aq Shandybulaq bulaǵyndaǵy zańsyz salynǵan bógetter men toǵandardy buzǵan. Sonyń áserinen Qaljyr ózeniniń negizgi arnasyna túsken usaq qumdy topyraq onyń edáýir aýmaǵyn lastaǵan. Lai tunbaly las sý ózen aǵysymen birshama qashyqtyqqa jaiylyp, 53,3 mg/m3 deiingi qalqyma zattardyń ózendi lastaýyna ákeldi.
Qaljyr ózeniniń odan ári lastanýyna jol bermeý úshin ekologiia departamentiniń inspektorlary zańsyz qurylystardy qalpyna keltirý jumystaryn toqtatty. Atalǵan jumystardy qaýipsiz júrgizý úshin jobalyq qujattamany ázirleý usynyldy.
Búgingi kúni tabiǵi sýlardy synaý hattamalaryna sáikes ziian shekken sý aidynyndaǵy lastaýshy zattardyń quramy shekti ruqsat etilgen kontsentratsiiadan aspaidy. Jerústi sýlarynyń sapasy qalpyna keltirildi.
Altyn kenin izdeý boiynsha jumystardy zańsyz júrgizgeni, ruqsat etilmegen qurylystardy buzý týraly sot sheshimin oryndamaǵany, sondai-aq ekologiialyq saraptama júrgizbei obektilerdi óz betinshe salǵany úshin Kúrshim aýdanynyń № 2 aýdandyq soty men ShQO Ekologiia departamentiniń sheshimimen kásipkerlerge jalpy somasy jarty million teńgeden astam aiyppul salynyp, ken óndirýshilekke berilgen litsenziialary keri qaitaryldy.
Budan basqa, quqyq buzýshylyqtardyń saldaryn joiý maqsatynda «Hvan» JK remediatsiia baǵdarlamasyn bekitti, oǵan sáikes biylǵy jylǵy qarashaǵa deiin Qaljyr ózeniniń gidrologiialyq rejimin jáne taý landshaftyn qalpyna keltirý boiynsha birinshi kezektegi is-sharalardy oryndaý qajet.
Qazirgi ýaqytta óńir ákimdigi tabiǵi komponentterdi qalpyna keltirý boiynsha jumystardyń keńeitilgen smetalyq esebin jasaýdy pysyqtaýda, onyń somasyna bailanysty politsiia organdary QR QK 324, 328, 333 jáne 334-baptary boiynsha kináli adamdardy qylmystyq jaýapqa tartý týraly máseleni qaraityn bolady.
«Sonymen qatar, osyndai zań buzýshylyqtardy boldyrmaý maqsatynda memlekettik organdardyń ókilderi jergilikti belsendilermen kezdesý uiymdastyrdy, onyń nátijesinde quqyq buzýshylardy karerlerdi rekýltivatsiialaý jónindegi jobalardy (onyń ishinde túbin qaýipsiz tásilmen tazartýdy júrgizý) ázirleýge mindetteý, sondai-aq jer qoinaýyn paidalanýshylardyń qyzmetine qoǵamdyq baqylaýdy kúsheitý jóninde sheshim qabyldandy»,- 
delingen habarlamada.
