Qazaqstan Respýblikasynyń Premer-Ministri Asqar Maminniń tóraǵalyǵymen ótken Úkimet otyrysy Memleket basshysynyń «Nur Otan» partiiasynyń XVIII sezinde bergen tapsyrmalaryn oryndaý máselelerine arnaldy, dep habarlaidy "Ult aqparat".
A. Mamin Prezident áleýmettik salany damytý men azamattardyń turmys sapasyn arttyrýǵa úlken mán beretinin atap ótti.
«Elbasy kez kelgen ekonomikalyq jetistikter árbir adamnyń ál-aýqatynyń ósýine jol ashýy kerek ekenin aityp ótti. Osyǵan orai, Memleket basshysynyń "Áleýmettik qamqorlyq" jańa áleýmettik bastamalary elimizdi damýdyń taǵy bir jańa satysyna shyǵarýy tiis», — dedi A. Mamin.
Halyqtyń turmys sapasyn arttyrý jáne Qazaqstandy áleýmettik baǵdarlanǵan memleket retinde damytý — árbir Úkimet múshesi úshin negizgi basymdyq bolýy kerek.
Premer-Ministr kelesi baǵyttar boiynsha Memleket basshysynyń Jańa áleýmettik saiasatyn iske asyrýǵa dereý kirisýdi tapsyrdy:
-
halyqtyń tabysyn arttyrý jáne turmysy tómen adamdardy qoldaý;
-
kópbalaly jáne az qamtylǵan otbasylardy turǵyn úimen qamtamasyz etý;
-
bilim berý jáne densaýlyq saqtaý salalaryn, áleýmettik infraqurylymdy jańǵyrtý;
-
óńirlerdi keshendi túrde damytý.
Máseleni qaraý barysynda Memleket basshysynyń alǵa qoiǵan tapsyrmalaryn oryndaý sharalary týraly Premer-Ministrdiń Birinshi Orynbasary – qarjy ministri Á. Smaiylov, Premer-Ministrdiń Orynbasary G. Ábdiqalyqova, eńbek jáne halyqty áleýmettik qorǵaý ministri B. Saparbaev, bilim jáne ǵylym ministri K. Shámshidinova, densaýlyq saqtaý ministri E. Birtanov, ulttyq ekonomika ministri R. Dálenov, indýstriia jáne infraqurylymdyq damý ministri R. Skliar, energetika ministri Q. Bozymbaev, sondai-aq Almaty oblysynyń ákimi A. Batalov, Qaraǵandy oblysynyń ákimi E. Qoshanov, Astana qalasynyń ákimi B. Sultanov baiandady.
Sonymen qatar, otyrysta «Nur Otan» partiiasynyń hatshysy F. Qýanǵanov sóz sóiledi.
Premer-Ministr Asqar Mamin máseleni qaraý qorytyndysy boiynsha ortalyq jáne jergilikti memlekettik organdarǵa birqatar naqty tapsyrmalar berdi.
«Memleket basshysy Úkimet pen ákimderdiń aldyna halyqtyń turmys sapasyn jaqsartýǵa qatysty mańyzdy mindetter qoidy. Olardyń sheshimin tabý Úkimet pen ákimderdiń úilesken birlesken jumysyn talap etedi. Elbasynyń partiia sezinde alǵan qoǵain barlyq tapsyrmalary sapaly ári ýaqytyly oryndalýy tiis. Úkimet muqtaj azamattardy áleýmettik qoldaý boiynsha tiimdi jumys júrgizýi kerek. Biýrokratiia men formalizmge jol berilmesin», — dedi A. Mamin.
Qarapaiym adamdardyń máselelerin sheshý qajettigi atalyp ótti. Barlyq memlekettik organdar, ásirese jergilikti jerlerde, osy baǵytta qarqyndy jumys atqarýy kerek. A. Mamin iri qalalardyń qala mańy aýmaǵynda, shaǵyn jáne mono qalalarda turǵyndardyń qolaily ómir súrýine jaǵdai jasaýdy, ásirese aýylda jańa turaqty jumys oryndarynyń ashylýyn qamtamasyz etýdi tapsyrdy.
Áleýmettik infraqurylymdy damytý turǵysynan bilim berý, densaýlyq saqtaý, mádeniet jáne sport obektilerin salý, olardyń qoljetimdiligi men qyzmet kórsetý sapasyn qamtamasyz etý tapsyryldy.
Injenerlik-kommýnaldyq infraqurylymdy, onyń ishinde jergilikti jol jelilerin, elektr energetikasy men gazben jabdyqtaýdy jańǵyrtý máselelerine erekshe kóńil bólý tapsyryldy.
«Memleket basshysynyń áleýmettik bastamalarynyń árbir baǵyty boiynsha oryndaý merzimi men jaýapty memlekettik organdardy naqty kórsetip, Jol kartalary ázirlensin. Baǵyttardyń árqaisysyn damytý elimizdiń áleýmettik-ekonomikalyq damýyna, halyqtyń turmys sapasynyń jáne az qamtylǵan jáne kómekke asa muqtaj azamattardyń tabysynyń artýyna úlken serpin beredi», — dep Premer-Ministr A. Mamin, barlyq is-sharalardy júzege asyrýǵa dereý kirisýdi tapsyrdy.
