Foto: Akorda.kz
Memleket basshysy Stepnogorsk qalasynyń jylý elektr ortalyǵynyń jumysymen tanysty, dep habarlaidy Aqorda.
Prezidentke «Stepnogorsk jylý elektr ortalyǵy» JShS-niń tehnikalyq jai-kúii jáne Aqmola oblysyndaǵy jylytý maýsymynyń barysy jóninde málimet berildi.
Jylý energetika nysanynyń birinshi kezeńi 1966 jyly paidalanýǵa berilgen, al jańa óndiristik qýatyn iske qosý 1989 jylǵa deiin jalǵasqan.
Oblys ákimi Ermek Marjyqpaevtyń aitýynsha, óńir boiynsha Stepnogorskide bir JEO bar jáne 663 qazandyq jumys isteidi. Qazandyq jabdyqtarynyń ortasha tozý deńgeii 50 paiyzǵa jetken. 9 jylý kóziniń paidalanylyp kele jatqanyna 50 jyldan asqan, al 637 qazandyqtyń iske qosylǵanyna 25 jylǵa jýyqtaǵan. Stepnogorsk qalasyndaǵy jylý jelileriniń 82 paiyzy tozǵan. Aqmola oblysynda jylytý maýsymy aiaqtalǵannan keiin barlyq jylý jelisine jáne qazandyq jabdyqtaryna tehnikalyq tekserý júrgiziledi.
Oblys ákiminiń baiandamasyn tyńdaǵan Prezident Premer-Ministrdiń birinshi orynbasary Roman Skliarǵa ákimdikpen birge Stepnogorsk qalasyn jylýmen qamtý máselesiniń sheshý joldaryn egjei-tegjeili pysyqtaýdy tapsyrdy.
– Roman Vasilevich, Siz ákimdikpen birge otyryp, osy máselelerdi sheshý úshin is-áreketter algoritmin ázirleýińiz kerek. Bul jaǵdaida báriniń de – ieleriniń de, ákimdiktiń te, operatordyń da tyǵyryqqa tirelgeni baiqalady. Atalǵan máselelerdi dál qazir asyǵys sheshpeýimiz kerek. Siz maǵan baiandadym dep esepteńiz. Endi osy máseleni sheshýmen ainalysý kerek, – dedi Qasym-Jomart Toqaev.
Sonymen qatar Memleket basshysyna Kókshetaý qalasyndaǵy JEO qurylysyna qatysty tapsyrmasynyń oryndalý barysy týraly esep berildi.
Oblys ákimi Úkimetpen birlesip, jobany júzege asyrý jumystary júrgizilip jatqanyn jetkizdi.
JEO-nyń qýatyn saǵatyna 520Gkal jylý men 240MBt elektr energiiasyn óndiretin deńgeige deiin ulǵaitý jóninde sheshim qabyldandy.
