Prezident Qasym-Jomart Toqaev Soltústik Qazaqstan oblysynda astyq jinaý naýqanymen tanysty, dep habarlaidy "Ult aqparat" Aqordaǵa silteme jasap.
Memleket basshysy egistik alqabyn aralap, «Abi jer» JShS-niń astyq jinaý naýqanynyń barysymen tanysty.
Prezident dihandarmen áńgime barysynda Soltústik Qazaqstan oblysy elimizdiń mańyzdy astyqty ólkesi ekenin, munda álemdik naryqta suranysqa ie ekologiialyq taza, tabiǵi ónim óndiriletinin aitty.
«Soltústik Qazaqstan oblysy mańyzdy astyqty ólkemizdiń biri. Qazirgi basty maqsat – egis alqaptaryndaǵy astyqty tókpei-shashpai túgeldei jinap alý. Daqyldardy ártaraptandyrý óte mańyzdy, ásirese, eksportqa shyǵarý úshin qajet. Bizdiń naryǵymyz óte úlken. Soltústik Qazaqstan oblysynyń ónimi álemde, sonyń ishinde, Qytaida joǵary baǵalanady. Iaǵni, úlken múmkindikter bar. Óńirdiń áleýeti zor dep oilaimyn. Joldaýǵa keletin bolsaq, ony júzege asyrýdyń barlyq tetikteri Úkimetpen, tiisti mamandarmen kelisilgen. Sondyqtan ony tek qana oryndaý kerek. Kezinde úlken, aýqymdy memlekettik baǵdarlamalar júzege asyryldy, biraq, qazir shaǵyn ári elge túsinikti ulttyq jobalar kerek», – dedi Memleket basshysy.
Memleket basshysyna óńirdiń áleýmettik-ekonomikalyq damýynyń negizgi kórsetkishteri men agroónerkásip kesheniniń keleshegi týraly málimet berildi. Oblys ákiminiń aitýynsha, óńirde agrarlyq sektordy ártaraptandyrý jumysy qyzý júrgizilip jatyr. Maily daqyldardyń alqaby 1 million gektarǵa jýyqtaǵan. Jyl basynan beri agrosektorǵa 61 milliard teńge investitsiia tartylǵan.
Aimaq basshysy Qumar Aqsaqalov Soltústik Qazaqstan oblysynyń mineraldy tyńaitqyshtardy paidalaný jóninen elimiz boiynsha aldyńǵy orynda ekenin jetkizdi. Biyl 2,3 mln gektar aýmaqqa 130 myń tonna tyńaitqysh paidalaný josparlanǵan. Sonymen qatar oblysta aýyl sharýashylyǵy tehnikasyn jańartý jumystary júrgizilýde. Sonyń nátijesinde ónim óndirý kórsetkishi artqan. Aldaǵy ýaqytta «CLAAS» nemis kontserni Petropavlda aýyl sharýashylyǵy tehnikasyn qurastyrmaq.
Kezdesý sońynda Qasym-Jomart Toqaev diqandardyń mol astyqty der kezinde jinap alýyna tilektestik bildirip, jumystaryna tabys tiledi.
