Sheteldikterge jerdi satýǵa zań júzinde birjola tyiym salynady. Bul týraly Ulttyq qoǵamdyq senim keńesiniń 5-otyrysynda QR Prezidenti Qasym-Jomart Toqaev aitty, dep habarlaidy "Ult aqparat".
«Bul – memlekettigimizdiń berik negizi jáne qasietti simvoly. Qazaqtyń jeri sheteldikterge satylmaidy dep birneshe ret aittym. Bul máselege qatysty qaýesetterdi toqtatý qajet. Sondyqtan men mynadai naqty sheshimder qabyldadym:
Birinshiden, sheteldikterge jáne sheteldik zańdy tulǵalarǵa aýyl sharýashylyǵy jerlerin satýǵa, jalǵa berýge zań júzinde birjola tyiym salýdy tapsyramyn.
Bul sheteldikterdiń úlesi bar zańdy tulǵalarǵa da qatysty. Men muny Prezidenttiń zań shyǵarý bastamasy arqyly jedel túrde júzege asyrý qajet dep sheshtim.
Prezident Ákimshiligi dál osy máselege bailanysty tiisti zań jobasyn ázirleýi kerek.
Ekinshiden, bir aidyń ishinde Jer reformasy jónindegi komissiiany quryp, 25 naýryzda jumysqa kirisýdi tapsyramyn. Komissiianyń quramyna agrarlyq sektordyń bedeldi ókilderin jáne jer máselesin jetik biletin sarapshylardy qosý kerek.
Úshinshiden, Úkimetke biylǵy tamyz aiynyń sońyna deiin jer reformasynyń negizgi máseleleri boiynsha ortaq mámile arqyly túbegeili bailam jasaýdy tapsyramyn.
Tórtinshiden, komissiia jumysynyń árbir kezeńi jáne onda usynylǵan sharalar týraly halyqty únemi habardar etip otyrý kerek.
Basty mindettiń biri – komissiia jumysynyń jáne sheshim qabyldaýdyń meilinshe ashyqtyǵyn kórsetý.
Biz jerge qatysty qoǵam tarapynan kóterilgen barlyq máseleni durys jáne tiimdi sheshe alamyz dep senemin.
Bul sheshimder, eń aldymen, el ekonomikasyn damytýǵa jáne azamattardyń turmys sapasyn arttyrýǵa arnalǵan.
Eń bastysy, jer sheteldikterge satylmaityny týraly túbegeili sheshim qabyldandy», - dedi Qazaqstan Prezidenti.
