Búgin Astanada QR Prezidenti janyndaǵy Sheteldik investorlar keńesiniń 31-shi plenarlyq otyrysy ótti. Memleket basshysy Nursultan Nazarbaev kelesi otyrystyń taqyryby men kúnin belgiledi, dep habarlaidy QazAqparat tilshisi.
«Kelesi otyrysty adam kapitalyn damytý máselesine arnaý qajet. Ony 2019 jyly 6 maýsym kúni Astanada ótkizýdi usynamyn. Úkimet bolsa, barlyq jumys toptarynyń usynystaryn qarap, búgingi aqyl-keńesterdi saraptap shyǵýy qajet», - dedi N.Nazarbaev otyrysy sońynda.
Aita keteiik, búgingi keńes kezinde sheteldik investorlar adam kapitalyn damytý máselesin kótergen bolatyn.
«Birinshiden, adam kapitalyn áli de jaqsartý qajet. Ásirese, qazirgi ozyq tehnologiialardy eskere otyryp, maman daiarlaý máselesine basa nazar aýdarǵan jón. Sebebi sapaly jumys kúshi áli de jetispei jatyr. Ondai problemaǵa sheteldik investorlar ǵana emes, jergilikti kompaniialar da tap bolýda. Dál osy másele biznesti damytýǵa qolbailaý bolyp otyr. Ekinshiden, jańa Ekologiialyq kodeksti birlesip ázirleý kerek. Búginde Qazaqstan qorshaǵan ortany qorǵaý máselesine erekshe kóńil bólip keledi. Alaida normativtik aktilerdi ázirlegende qazaqstandyq óndiristiń jahandyq básekelestigin de eskerý kerek. Sonyń nátijesinde ekonomikalyq ósim de bolady. Bizdińshe, aiyppuldardy salǵan kezde naqty dálelder bolýy qajet. Sosyn ekonomikalyq zalaldy janama baǵalaýdy alyp tastaǵan durys», - dedi A.Preimanis búgingi otyrysynda.
Al QR Investitsiialar jáne damý ministri Jeńis Qasymbek bir jyldyń ishinde atqarylǵan jumys boiynsha esep berdi.
