Ortalyq sailaý komissiiasy prezidenttikke úmitker ár kandidatqa sailaýaldy naýqan úshin respýblikalyq biýdjetten bólinetin boljamdy somany atady, dep habarlaidy Sputnik Qazaqstan tilshisi.
Ortalyq sailaý komissiiasynyń hatshysy Sabila Mustafinanyń aitýynsha, respýblikalyq biýdjetten qarastyrylatyn aqsha kandidattyń BAQ-ta sailaýaldy baǵdarlamasyn jariialaýǵa, úgit materialdaryn shyǵarýǵa, ǵimaratty jalǵa alýǵa, kólik shyǵyndaryna bólinedi.
"Biz ár kandidatqa jumsalatyn shyǵyndy eseptedik. Shamamen 7,5 million teńgeden shyǵyp otyr", - dedi Mustafina OSK-de ótken baspasóz máslihatynda.
Ol munyń tek boljamdy soma ekenin, biraq buǵan deiingi prezident sailaýy naýqany kezinde bólingen somadan mindetti túrde kóp bolatynyn atap ótti.
Bul biyl qańtar aiynan bastap elimizde eń tómengi jalaqy mólsheriniń 42 500 teńgege ulǵaiýymen bailanysty.
"Ortalyq sailaý komissiiasy sailaý aldy naýqanǵa qajet boljamdy smetany esepteidi. Keiin ony úkimetke jiberedi, qarajatty bólý týraly sheshimdi úkimet qabyldaidy. Sailaý kezekten tys bolǵandyqtan, bul aqsha rezervten bólinedi", - dedi ol.
Mustafina OSK boljamdy smetany qarjy ministrligine búgin jibergenin aitty.
Buǵan qosa, ol kandidattyń sailaý qory qalai qalyptasatynyna da toqtaldy. Birinshiden, ol kandidattyń óz qarajaty men kandidatty usynǵan respýblikalyq qoǵamdyq birlestiktiń bólgen qarjysy esebinen quralady. Onyń jalpy somasy eń tómengi jalaqy mólsheriniń on eki myń eselengen somasynan aspaýy tiis.
"Biyl eń tómengi jalaqy óskendikten, bul soma 510 million teńgeden aspaýy tiis", - dedi OSK hatshysy.
Ekinshiden, respýblika azamattary men uiymdarynyń erikti salymdarynan turady. Onyń jalpy somasy eń tómengi jalaqynyń on bes myń eselengen somasynan aspaýy kerek, iaǵni 637, 5 million teńgeden aspaýy tiis.
