Memleket basshysy Parlamenttiń jumysyna qatysty qoǵamdaǵy túrli pikirtalasqa birjola núkte qoidy. Bul týraly Senat tóraǵasy Máýlen Áshimbaev málim etti, dep habarlaidy QazAqparat.
«Prezidentimiz zańdardyń qabyldaný tártibine qatysty da tyń normalar usyndy. Olar elimizdiń qazirgi damýyndaǵy úrdister men talaptarǵa tolyǵymen sai keledi. Munyń bári – eń joǵarǵy ókildi organ jumysynyń tiimdiligin arttyrý úshin jasalyp otyrǵan qadamdar. Osylaisha, Memleket basshysy Parlamenttiń, onyń ishinde Senattyń jumysyna qatysty qoǵamdaǵy túrli pikirtalasqa birjola núkte qoidy. Parlamenttiń respýblikalyq biýdjettiń sapaly oryndalýyna baqylaýdy kúsheitý máselesi de nazardan tys qalǵan joq», - dedi M. Áshimbaev Senattyń jalpy otyrysynda.
Memleket basshysy osy oraida Esep komitetiniń ornyna Joǵary aýditorlyq palata qurý máselesin kóterdi. Sonymen qatar Joldaýda saiasi básekelestikti jáne partiialyq júieni damytý sharalary týraly aityldy.
«Sailaý júiesin jetildirýge qatysty da naqty usynystar sóz boldy. Jergilikti atqarýshy jáne ókiletti bilik organdarynyń jumysyn jandandyratyn basymdyqtardyń da mańyzy zor. Prezidentimiz máslihattardyń rólin arttyrý, olardyń derbestigin qamtamasyz etýge baǵyttalǵan mańyzdy bastamalardy jariialady.
Bul azamattardyń ókildi bilikke degen senimin nyǵaitatyny anyq. Memleket basshysy ádiletti jáne quqyqtyq memleket qalyptastyrý jolynda Konstitýtsiialyq sot qurýdy usyndy. Buqaralyq aqparat quraldary men azamattyq qoǵam institýttarynyń jumysyn jańǵyrtý isine de kóńil bólindi. Joldaýda daǵdarysqa qarsy sharalardy ári qarai belsendi túrde jalǵastyrý boiynsha da naqty tapsyrmalar berildi. Osy rette kóterilgen máseleler qoǵamnyń qajettiligi men suranysyna negizdelgenin erekshe atap ótken jón», - dedi Senat tóraǵasy.
«Prezidentimiz Joldaýda aitylǵan basymdyqtardy oryndaý úshin Konstitýtsiianyń 30-dan astam babyna ózgeris engizý qajettigin aitty.
Odan bólek, osy jyldyń sońyna deiin 20-dan astam zań qabyldaý kerek. Iaǵni, bizdiń aldymyzda úlken maqsattar tur. Sol sebepti aldaǵy ýaqytta júieli ári keshendi jumys júrgizýimiz qajet. Zańdardy qabyldaý barysynda halyqtyń, azamattyq qoǵam ókilderiniń, sarapshylardyń pikirlerin eskerý asa mańyzdy. Prezidenttiń bastamalaryn zańnamalyq turǵydan qoldaý – bizdiń basty mindetimiz. Sol sebepti qazir naǵyz «bel býyp, bilek túrip» jumys isteitin kezeń. Halyqtyń bizden kútetini de, talap etetini de sol», - dedi Máýlen Áshimbaev.
