Memleket basshysy Qasym-Jomart Toqaev investorlarǵa qisynsyz talaptar qoiatyn ákimderge eskertý jasady, dep habarlaidy "Ult aqparat".
«Investitsiialar turaqty túrde tartylýy kerek. Ákimder investitsiia tartýmen ainalysýy kerek. Keibir kezde teledidardan sizderdiń kásipkerler delegatsiiasyn, investorlardy qalai qabyldaityndyqtaryńyzdy kóremin. Bundai sharalar eshqaida jaramaidy, ózderińiz ústeldiń basyna jaiǵasyp, olardy 3-4 metr alshaq otyrǵyzasyzdar. Ózderińizdi qandai da bir kniazdyqtyń basshysy retinde kórsetesizder. Bul rette investitsiiany tartýǵa sizder emes, olar múddeli bolǵandai baiqalady», - dedi Memleket basshysy Úkimettiń keńeitilgen otyrysynda.
Osy oraida, Prezident ákimderdiń osy ispettes is-qimyldary telearnalar arqyly kózge ersi kórinetinin atap ótti. Sonymen qatar investorlarmen kezdesý barysynda óńir ókilderi tarapynan qisynsyz talaptar bolyp jatady.
«Paraqorlyqqa jol bermeý kerek. Eger de osyndai áreketpen bireý baiqalsa, onda eńbegi men jumys tájiribesine qaramastan, ákimder tiisti jazasyn alady. Bul turǵyda sizderdi aldyn ala eskerttim dep túsinińizder», - dedi Qasym-Jomart Toqaev.
