Foto: Akorda.kz
Prezident Qasym-Jomart Toqaev Ishki ister ministrliginiń keńeitilgen alqa májilisinde otbasylyq zorlyq-zombylyq máselesine qatysty pikir bildirdi, - dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy keiingi jyldary otbasyndaǵy turmystyq zorlyq-zombylyq statistikasy kóńil kónshitpeitinin málimdedi.
«Otbasyndaǵy turmystyq zorlyq-zombylyqtyń aldyn alý jumysynyń tiimdiligin arttyrýǵa erekshe nazar aýdarý kerek. Statistika kóńil kónshitpeidi. Sońǵy eki jarym jylda úidegi zorlyq-zombylyqtyń saldarynan 300 adam kóz jumdy. Densaýlyqqa aýyr ziian keltirýdiń 878 faktisi jáne ortasha ziian keltirýdiń 808 faktisi tirkelgen. Osyndai quqyq buzýshylyqtar boiynsha 37 myńnan astam adam ákimshilik jaýapkershilikke tartyldy.
Jaǵdaidy túzeý úshin aldyn alý sharalaryn keshendi túrde júrgizý qajet. Bul jerde ýchaskelik inspektorlar sheshýshi ról atqarady. Ýaqtyly sharalar qabyldansa, otbasylyq jáne turmystyq urys-keris kezinde jasalǵan qylmystardyń kópshiliginiń aldyn alýǵa bolar edi. Iaǵni bireýdiń ómiri men densaýlyǵyn saqtap qalar edik. Muny tájiribe kórsetti. Qoǵam sizderden otbasyndaǵy turmystyq zorlyq-zombylyqqa qarsy tiimdi ári júieli is-áreket kútedi.
Bul másele ádiletti memleket qurý úshin óte mańyzdy. Kóptegen áleýmettik keseldiń túp tamyry, sonyń ishinde qylmys kóbine turmysy nashar otbasylardan bastaý alady. Mundai otbasylardaǵy zorlyq-zombylyqtar balalardyń sana-sezimine jáne psihikasyna keri áserin tigizedi. Sondyqtan quqyq qorǵaý organdary adamdardyń qundylyqtar júiesi men minez-qulyq modelin ózgertýde sheshýshi ról atqara alady jáne atqarýy qajet» - dedi Toqaev.
