Memleket basshysy Elordadaǵy №23 orta mektepke bardy, dep habarlaidy "Ult aqparat" Aqordaǵa silteme jasap.
Mektepti aralaý barysynda Nur-Sultan qalasynyń ákimi Altai Kólginov Prezidentke astanany damytý jónindegi keńeste berilgen tapsyrmalardyń oryndalýy týraly baiandady. Onyń aitýynsha, biyl 5 myń oryndyq 6 jańa mektep, al 2020 jyly 9 myń oryndyq 12 mektep paidalanýǵa beriledi.
Memleket basshysyna Elorda halqynyń 25 paiyzy turatyn qala aýmaǵyndaǵy 16 turǵyn úi alabyn damytý jónindegi tapsyrmalarynyń júzege asyrylý jaiynda da málimet berildi. Sondai-aq Altai Kólginov qazirgi ýaqytta qalada úsh aýysymdy 8 mektep baryn, keleshekte olardyń sany ortasha eseppen jyl saiyn 10-12 mektepke artatynyn aitty.
Sonymen qatar ákim Prezidenttiń tapsyrmasy boiynsha buqaralyq sportty damytý maqsatynda 4 jańa sport nysanynyń qurylysy bastalǵanyn habarlady.
Memleket basshysy №23 mekteptiń materialdyq-tehnikalyq bazasymen tanysyp, oqý kabinetterin aralady, oqýshylarmen jáne muǵalimdermen áńgimelesti. Muǵalimder Prezidentke mekteptiń qajettilikteri týraly aitty.
Qasym-Jomart Toqaev mekteptiń túitkildi máselelerimen tanys ekenin, atalǵan aýdanda qysqa merzim ishinde jańa mektep salý jóninde tapsyrma bergenin atap ótti.
– Bul – iske asatyn jospar. Sizderge aldaǵy ýaqytta jańa mektepte jumys isteýge múmkindik bolady, – dedi Memleket basshysy.
