Monoqalalardaǵy injenerlik infraqurylymnyń jai-kúii óte nashar. Bul týraly Memleket basshysy Qasym-Jomart Toqaev aitty, dep habarlaidy QazAqparat.
«Monoqalalardaǵy injenerlik infraqurylymnyń jai-kúii óte nashar. Sý qubyrlary men káriz jelisiniń tozýy ortasha eseppen 61 paiyzdy quraidy. Al Arqalyq, Balqash, Shahtinsk, Temirtaý qalalarynda tipti 90 paiyzǵa deiin jetedi», - dedi Qasym-Jomart Toqaev Ekibastuzda ótip jatqan monoqalalardy damytý máselelerine arnalǵan jinalysta.
Aqordanyń Twitter-degi málimetine sáikes, Memleket basshysy monoqalalardaǵy jylý jáne elektr taratý jelileri de ortasha eseppen 55 paiyzǵa tozǵanyn atap ótken. Kei qalalarda bul kórsetkish 85 paiyzǵa deiin jetedi. Al avtomobil joldarynyń 40 paiyzy qanaǵattanarlyq kúide emes.
Buǵan deiin habarlaǵanymyzdai, búgin Prezident Qasym-Jomart Toqaev jumys saparymen Pavlodar oblysynyń Ekibastuz qalasyna keldi. Memleket basshysy jumys sapary barysynda monoqalalardy damytý jóninde keńes ótkizip, Prezidenttik jastar kadr rezerviniń ókilderimen kezdesedi. Sonymen qatar qaladaǵy indýstrialdy kásiporyndarǵa barady dep josparlanǵan.
