QR Prezidenti Qasym-Jomart Toqaev mektepterdiń aldaǵy jańa oqý jylyna daiyndyǵyn pysyqtady, - dep habarlaidy «Ult aqparat».
«Úkimetke jyl sońyna deiin 250-den astam turǵyny bar eldi mekenderdi sapaly internetpen qamtamasyz etýdi tapsyramyn. Bul, halqymyzdyń 99,3 paiyzyn qamtidy. Qashyqtan oqytý ádisine kóshý isi infraqurylym men internet sapasyna qatysty eleýli máselelerdiń bar ekenin kórsetti. Muǵalimderdiń 20 paiyzdan astamy úilerinde tolyqqandy internet pen kompiýter joq bolǵandyqtan, qashyqtan tiimdi oqyta almady», - dedi Prezident Úkimettiń keńeitilgen otyrysynda.
Sonymen birge, Q. Toqaev mektepter balansyndaǵy 400 myńnan astam kompiýterdiń tek 40 paiyzy iske jaraǵanyn aitty.
«Bul – ákimdikter men ministrliktiń jumysynyń nátijesi. Ákimdikter jańa oqý jylyna dereý daiyndalyp, mektepter men jekelegen muqtaj otbasylardy qajetti tehnikamen jabdyqtaýǵa tiis. 1 qyrkúiekte jańa oqý jyly bastalady. Ministrliktiń bul oqiǵaǵa daiyndyǵyna kúmánim bar. Balalar qalai oqidy – mektepte nemese qashyqta? Muǵalimderdiń jańa oqý jylyna daiyndyǵy qandai?», - dep suraq qoidy Memleket basshysy.
Eske sala ketsek, Qasym-Jomart Toqaevtyń tóraǵalyǵymen Úkimettiń keńeitilgen otyrysy beinebailanys júiesi arqyly ótti.
Jiynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomikalyq damý qorytyndysy týraly esep berdi. Sondai-aq koronavirýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boiynsha bergen tapsyrmalary men mindetteri qarastyryldy.
