Memlekettik qyzmet – eksperiment alańy emes. Bul týraly Prezident Qasym-Jomart Toqaev «Qazaqstan» telearnasyna bergen suhbatynda aitty, dep habarlaidy "Ult aqparat".
«Negizi, kadr máselesin óte kúrdeli, óte mańyzdy ári názik másele dep aitýǵa bolady. Rasynda, kóp nárse bilikti kadrlarǵa bailanysty. Meniń bastamam boiynsha Prezidenttik jastar kadrlyq rezervi quryldy. Kadrlyq rezervke ótken azamattar birtindep jaýapty qyzmetke taǵaiyndalyp jatyr. Árine, munymen shektelýge bolmaidy. Basqa da adamdarǵa jol ashýymyz kerek», - dedi Memleket basshysy.
Prezident memlekettik qyzmetshilerge qoiylatyn talap óte joǵary bolýǵa tiistigin basa aitty.
«Kez kelgen adam birden ministr nemese ákim bola salmaidy. Ol anyq nárse. Biraz ýaqyt, mol tájiribe kerek. Ondai laýazymǵa bilimdi, bilikti, qyzmetine adal azamattardy taǵaiyndaǵan jón. Burynǵy mamandardyń bárin jumystan shyǵarý durys bolmas edi. Oryssha «politicheskaia chistka», iaǵni «saiasi tazalaýǵa» barýdyń qajeti joq. Memlekettik basqarý salasyna birte-birte jańa mamandar keledi. Kelip te jatyr. Bul – qalypty úderis. Biraq, bir nárseni este ustaǵan jón. Memlekettik qyzmet – eksperiment alańy emes! Sondyqtan bul jumysty birte-birte júrgizemiz», - dedi ol.
